Diskriminoi bashkitë e veriut, Basha në Tropojë: Edi Rama pasuroi klientët grabitqar!

Kryetari i Partisë Demokratike, Lulzim Basha, duke folur para strukutrave të PD dhe qytetarëve të Tropojës tha se qeveria ka diskriminuar bashkitë e veriut për të ndëshkuar politkisht qytetarët që nuk mbështesin qeverinë e Edi Ramës, dhe fondet kanë shkuar për bashkitë kliente të Ramës.

“Vetëm Veliera e Durrësit ka kushtuar më shumë se sa ç’ka marrë investime i gjithë qarku i Shkodrës. Ky është aparteid,” tha Lulzim Basha duke shprehur shqetësimin për gjendjen e rëndë ekonomike për shkak të përqëndrimit të ekonomisë në pak duar klientësh dhe oligarkësh të Edi Ramës.

“Pasuritë minerale, bregdetin, pyjet, gjithë ekonominë ua ka dhënë për dy lekë klientëve të vet, oligarkëve dhe të fortëve, më të cilët grabit vendin. Pasuritë natyrore, mineralet mbanin dikur ekonominë dhe ushqenin Shqipërinë, kurse sot nga to nuk merren as taksa dhe asnjë përfitim për shqiptarët, por vetëm pasurim për oligarkët grabitqarë,” tah lideri i opozitës duke konstatuar se politika grabitqare e qeverisë nuk ka prodhuar mirëqenie përmes turizmit apo tregtisë.

“Ato kanë prodhuar miliona për klientët e Ramës dhe më shumë varfëri për popullin. Këto politika grabitqare po shkatërrojnë turizmin dhe ekonomitë e vogla familjare për të pasuruar klientët grabitqarë të Ramës”.

Dhe jo vetëm kaq! Vendimet speciale të qeverisë për llogari të pak oligarkëve, u kanë hequr shqiptarëve të drejtën që të gëzojnë pasuritë e vendit.

“Bregdetin ua ka vjedhur qytetarëve dhe ia ka dhënë me vendime speciale oligarkëve, që kanë ndërtuar në toka të vjedhura buzë detit. Ka marrë pyjet dhe ua ka dhënë për dy lekë oligarkëve. Pyjet kanë qenë të shqiptarëve tani janë të oligarkëve. Lumenjtë, kanionet, ujëvarat po ua merr shqiptarëve dhe po ua jep oligarkëve për hidrocentrale dhe betonizim. Ato kanë qenë të shqiptarëve, tani janë të oligarkëve gabitqarë,” tha Kryetari i Partisë Demokratike duke vënë në dukje pasojat shkatërruese për ekonominë të vendimeve të qeverisë në keto 6 vjet.

Me këtë rast Kryetari i Partisë Demokratike u shpreh se qëllimi i aksionit politik të opozitës është largimi i Edi Ramës, qeveri tranzitore që do të përgatisë zgjedhjet e parakohshme.

“Vendimi për mospjesëmarrjen në farsën e 30 qershorit ishte vendim politik unanim për të vazhduar betejën, për të arritur objektivin tonë, largimin e kësaj qeverie dhe këtij kryeministri, rikthimin e të drejtës shqiptarëve për të zgjedhur me votë parlamentin dhe pushtetin vendor që meritojnë.”