Dita e Ashures, Kryegjyshi Bektashian: Përshpirtje, mirënjohje, shenjtërim për Dëshmorët e Qerbelasë

Ashurja që shpërndahet është një përshpirtje, një shenjë nderimi, mirënjohje, ëmbëlsimi, si shenjtërim për Dëshmorët e Qerbelasë, tha në mesazhin e tij me përfundimin e muajit Matem, sot në Selinë e Shenjtë të Kryegjyshatës Botërore Bektashiane në Tiranë, ku nën drejtimin e Kryegjyshit Botëror Bektashian, Haxhi Dede Edmond Brahimaj, u zhvillua ceremonia e Ditës së Ashures.

“Përkujtojmë Qerbelanë, dëshmorët e saj, që luftuan për liri, për paqe, në Ujdhesën Arabe të kohës, për emancipim të jetës njerëzore, që të kishte liri, që jeta të demokratizohej, që gruaja të kishte të drejta, e të trajtohej, njëlloj si njeri, si burri, që njerëzit të besonin në një Zot të vetëm, jo në idhuj: dru, gurë, fenomene, shkreptima të natyrës por, në një besim dhe në një Profet, në Profetin Muhamed a. s. 

Dëshmorët e Qerbelasë, që luftuan për liri, u tradhtuan, u zunë në kurth, në pabesi nga qindra mijëra falanga, ushtarësh të Jezitit, pa ujë, pasi i helmuan dhe të vetmin burim uji për jetën, Lumin Eufrat. Me mbetjet e ushqimeve që kishin me vete, grurë, fasule etj, sajuan të vetmin ushqim për të vazhduar luftën, ashuren,” tha Haxhi Dede Edmond Brahimaj duke përfunduar:

“Ashurja që shpërndahet është një përshpirtje, veneracion, një shenjë nderimi, mirënjohje, ëmbëlsimi, si shenjtërim për Dëshmorët e Qerbelasë.”

Ndryshe, për 10 ditë, bota bektashiane aleviane mbajti Matem, mbajti zi, për Qerbelanë, për 72 dëshmorët e saj, me Imam Hysenin në krye.