Dita e Çlirimit të Kosovës, synimi politik BE, destinacioni ushtarak NATO

Bashkimi Evropian është familja jonë e synuar politike, kurse NATO është destinacioni ynë ushtarak, tha Kryeministri Albin Kurti në seancën solemne të Parlamentit të Kosovës, për nder të 25-vjetorit të Ditës së Çlirimit të Kosovës, ditë kur forcat paqeruajtëse të NATO-s hynë në Kosovë, duke shënuar fundin e luftës.

Presidentja e Kosovës, Vjosa Osmani, tha se hyrja e NATO-s në Kosovë ishte triumf i të mirës ndaj të keqes dhe triumf i drejtësisë mbi shtypjen.

“Ata nuk ishin vetëm ushtarë, ata ishin shpëtimtarë, ata sollën me vete premtimin e lirisë, sigurinë se bota nuk kishe harruar për popullin e Kosovës, dhe vendosmërinë për t’i dhënë fund mizorive të kryera kundër popullit tonë,” tha Vjosa Osmani duke shtuar se sot Kosova e meriton të jetë pjesë e aleancës së NATO-s:

“Liria sot është përgjegjësi e trashëgimi që duhet ta mbrojmë dhe premtim që duhet ta përmbushim për këtë dhe çdo gjeneratë që vjen pas nesh. NATO-ja na dha mbështetjen dhe ne sot e synojmë dhe e meritojmë anëtarësimin në këtë organizatë ushtarake me ushtrinë tonë që me profesionalizmin e saj është e gatshme të bëhet kontribuuese për paqe kudo në glob.”

Kryetari i Parlamentit, Glauk Konjufca, tha se shteti serb kishte vetëm një synim, shfarosjen e një populli të tërë nga territori dhe përmes krimeve të cilat morën përmasën e gjenocidit.

“Për ne, Serbia mbeti e njëjtë, pavarësisht a u quajt dikur Mbretëri Jugosllave, a u quajt pastaj Jugosllavi Federative a Socialiste. Politikat e shtypjes, e dëbimit, e shpronësimeve, e diskriminimi dhe e nënçmimit, kanë qene tipari konstant i secilit prej këtyre regjimeve,” tha Glauk Konjufca.

Kryeministri i Kosovës, Albin Kurti, nga ana e tij tha se sot shënojmë 25 vjetorin e çlirimit të Kosovës duke qëndruar së bashku me aleatët tanë, njësoj si më 12 qershor dhe njësoj si në ditët e para të çlirimit.

Në Kosovën tonë demokratike, tha ai, pikërisht pse kemi humbur dhe vuajtur kaq shumë, dëshiron që të gjithë qytetarët pa dallim etnie të gëzojnë dhe të fitojnë; shumica shqiptare bashkë me pakicat serbe, boshnjake, turke, ashkalinjtë, romët, egjiptianët, por edhe me kroatët dhe malazezët.

“Sikur atëherë dhe tani, Serbia rri e rreshtuar prapa Rusisë, ashtu siç Rusia qëndron prapa shumë veprimeve të Serbisë, kurse shteti jonë Kosova, bashkë me Shqipërinë, ka shkuar duke i forcuar lidhjet dhe aleancën e saj me Shtetet e Bashkuara, me Britaninë e Madhe, Gjermaninë, Turqinë, Francën Italinë dhe vendet e tjera perëndimore. Bashkimi Evropian është familja jonë e synuar politike, kurse NATO-ja është destinacioni ynë ushtarak,” tha Kryeministri i Kosovës, Albin Kurti.

Me këtë rast, Presidenti i Shqipërisë, Bajram Begaj, tha se shqiptarët kanë nevojë për të ruajtur dhe forcuar kohezionin e tyre kombëtar dhe social kulturor edhe sot.

“Në një kohë kur Serbia dhe aleatët e saj kanë mobilizuar kapacitetet diplomatike dhe mediatike në një fushatë thellësisht keqdashëse për të njollosur luftën e drejtë dhe parimore të shqiptarëve për çlirimin e Kosovës.

Ne kemi nevojë më shumë se kurrë që të jemi bashkë. Ne kemi nevojë më shumë se kurrë për një manifest krenarie kombëtare,” tha Bajram Begaj duke premtuar se Shqipëria do të vazhdoj të lobojë për Kosovën për njohje të reja dhe integrimin e saj në organizata ndërkombëtare.

Ndërsa Ish-Presidenti i Kroacisë, Stipe Mesiç, tha se Bashkimi Evropian është shtëpi e përbashkët e rajonit dhe NATO një ombrellë e përbashkët e sigurisë dhe ekonomike.

“Pikërisht këtë po e theksoj këtu, në Prishtinë, në Republikën e Kosovës, duke shënuar 25 vjet nga çlirimi i Kosovës, para së gjithash falë UÇK-së, me ndihmën e bashkësisë ndërkombëtare, veçanërisht të aleancës së NATO-s dhe SHBA-së,” Stipe Mesiç duke shtuar se ndonëse mendohej se koha më e vështirë kishte kaluar, ka ende nevojë për veprim dhe prani të bashkësisë ndërkombëtare në rajon, jo vetëm në Kosovë por edhe në Bosnje Hercegovinë.

“Ne duhet të jemi gjithmonë të gatshëm të përballemi me shumë sfida, në fakt sfida të vjetra që janë ridizajnuar. Mund të them lirisht se arkitektura kufitare në rajon u kompletua me shpalljen e pavarësisë së Republikës së Kosovës. Fatkeqësisht, ka ende kërcënime dhe rreziqe nga të ashtuquajturat projekte megashtetërore. Paqja dhe stabiliteti duhet të jenë vendet tona të shenjta që duhet të sigurojnë prosperitetin e të gjithëve ne. Përgjigja më e mirë për të gjitha sfidat dhe kërcënimet është perspektiva euroatlantike,” tha Ish-Presidenti i Kroacisë, Stipe Mesiç.

I pranishëm në seancë ishte dhe shefi i Misionit Verifikues të Organizatës për Siguri dhe Bashkëpunim në Evropë, OSBE, në vitin 1999, William Walker, i cili u bë i njohur me rolin e tij vendimtar në dokumentimin e masakrës në Reçak të Shtimes, më 15 janar të vitit 1999, ku forcat serbe vranë 45 civilë shqiptarë. Ishte vetë William Walker i cili e cilësoi këtë masakër si krim kundër njerëzimit.

Pas kësaj seance solemne, në orën 12:00, për nder të 25 vjetorit të çlirimit të Kosovës u bë parakalimi i 1500 pjesëtarëve të njësive të Forcës së Sigurisë së Kosovës dhe të Policisë së Kosovës.

Ndryshe, më 12 qershor 1999 forcat paqeruajtëse të NATO-s hynë në Kosovë, duke shënuar fundin e luftës ndërkohë që bombardimet 78 ditore të NATO-s kundër Serbisë ishin përmbyllur më 10 qershor 1999 me miratimin e Rezolutës 1244 të Këshillit të Sigurimit të Kombeve të Bashkuara, kapitullimin e Serbisë dhe tërheqjen e forcave serbe nga Kosova.

Me Rezolutën 1244 të KS OKB-së në Kosovë u dërguan 37.200 ushtarë të KFOR-it nga 36 shtete, dhe filloi vendosja e misionit të përkohshëm të Organizatës së Kombeve të Bashkuara, UNMIK, i cili administroi Kosovën deri në pavarësimin e saj, 17 shkurt 2008.

Në luftën e Kosovës 1998-1999 janë vrarë më shumë se 13.000 persona dhe janë zhdukur më shumë se 6.000 persona. Mijëra shqiptarë të vrarë nga Kosova janë gjetur në varreza masive në Serbi, ku forcat serbe i kishin transportuar për të fshehur krimet.

Sot, 25 vjet pas hyrjes në Kosovë, janë mbi 4 mijë pjesëtarë të KFOR-it nga 28 shtete, ndërkohë më shumë se 1.600 persona konsiderohen ende të pagjetur