Dita e Flamurit, Ambasada e SHBA: Detyra jonë e përbashkët, të mbështetim idealet e kombit tonë

Në urimin për Ditën e Flamurit, Ambasada e Shteteve të Bashkuara në Tiranë shprehet se Flamuri i SHBA është një kujtesë e detyrës sonë të përbashkët për të mbështetur idealet themelore të kombit tonë, demokracinë, lirinë dhe drejtësinë për të gjithë.

“Sot shënohet Dita e Flamurit në Shtetet e Bashkuara duke përkujtuar miratimin e Yjeve dhe Shiritave nga Kongresi i Dytë Kontinental më 14 qershor 1777. Për njerëzit në mbarë Amerikën, flamuri ynë përfaqëson më shumë se 13 kolonitë origjinale (vijat) dhe 50 shtetet (yjet). Ai gjithashtu përfaqëson trimërinë (ngjyrën e kuqe), pastërtinë (e bardhë) dhe besnikërinë (blu),” shprehet Ambasada e Shteteve të Bashkuara në Tiranë në urimin e saj përmes rrjetit social Facebook duke përfunduar:

“Flamuri i SHBA është një kujtesë e detyrës sonë të përbashkët për të mbështetur idealet themelore të kombit tonë – demokracinë, lirinë dhe drejtësinë për të gjithë.”