Dita e Flamurit, Presidentja Osmani në Facebook, kryeparlamentari Konjufca homazhe në Prekaz dhe Boletin
Deri sa në Ditën e Fkamurit, Kryeministri i Kosovës ishte në ceremoninë e ngritjes së flamurit në Vlorë së bashku me krerët e shtetit shqiptar, Presidentja e Kosovës, Vjosa Osmani u shfaq në rrjetin social Facebook duke uruar shqiptarët ndërsa Kryetari i Parlamentit, Glauk Konjufca, dha mesazhin e parë pasë homazheve në Prekaz dhe Boletin.
“Më 28 nëntor, nderojmë historinë, flamurin dhe identitetin kombëtar, duke riafirmuar përkushtimin tonë për fuqizimin e shteteve tona.
28 Nëntori nuk është vetëm simbol i betejave dhe triumfeve tona, por edhe kujtim i sakrificave tona për të qenë të lirë, në paqe dhe krenarë,” shprehet Vjosa Osmani në urimin e saj përmes rrjetit social Facebook duke përfunduar:
“28 Nëntori është simbiozë e tri momenteve historike që e lartësojnë kombin tonë: ngritja e flamurit në Vlorë dhe shpallja e pavarësisë së Shqipërisë, dalja publike e UÇK-së dhe ditëlindja e komandantit legjendar Adem Jashari.
Të bashkuar në zemër e shpirt, le ta festojmë këtë ditë me krenari!”
Ndërkohë njeriu dy i shtetit të Kosovës, Glauk Konjufca, pas homazheve pranë varrit të heroit kombëtar, Isa Boletini, në Boletin, dhe homazheve pranë varrit të komandantit legjendar, Adem Jashari, në Prekaz, u shpreh se 28 Nëntori është ditë jonë e krenarisë, Dita e Flamurit tonë Kombëtar.
“28 Nëntori është dita më përbashkuese e popullit tonë dhe kombit shqiptar. Gëzuar popullit shqiptar 28 Nëntori, Ditën e Flamurit. E festofshim këtë ditë gjithmonë të lirë e krenar,” tha Kryetari i Parlamentit Glauk Konjufca.
Ndryshe, fjalimi vjetor më 21 Nëntor i Presidentes së Kosovës, Vjosa Osmani, para deputetëve siç duket nuk përfundoi vetëm me plotë mllef dhe kritika ndaj të gjithëve përveç Presidencës, por vazhdon dhe me vetëizolimin e Presidentes së Republikës edhe në ditën më të shenjtë të shqitarëve.
