Dita e Hashures/ Mesazh politikës, Baba Mondi: E çuat vendin në zgrip të varfërisë. Ky pushtet…

Sot besimtarët bektashinj kremtojnë Ditën e Hashures. Në një ceremoni në Kryegjyshatën Botërore, ku besimtarët përkujtuan 72 dëshmorët e rënë në fushën e Qerbelasë, Kryegjyshi Baba Mondi solli shembullin e Imam Hysenit për ti dhënë elitës politike edhe një mesazh për situatën e krijuar e cila nuk po gjenë zgjidhjen e krizës ndërsa e ka çuar vendin në zgrip të varfërisë.

“U themi sot politikanëve shqiptarë që ti afrohen aq sa munden jetës dhe veprës së Imam Hysenit sepse do të gjejnë në to jo thjesht kuriozitetin historik dhe fetar, por në mënyrë të veçantë konceptin e tij për pushtetin. Ky pushtet do të jetë vërtet në shërbim të popullit. Ta meritojmë respektin e popullit dhe jo ta kërkojmë atë përmes kulmeve dhe premtimeve të pambajtuara çfarë e çuan këtë vend në zgrip të varfërisë”.

Dita e Hashures është dita e fundit e Matemit. Vjen pas 10 ditë agjërimi gjatë të cilave përkujtohet sakrifica e besimtarëve bektashinj. E gjithë bota myslimane e kujton këtë ditë si ngjarjen më të dhimbshme në historinë e njerëzimit. Në fushën e Qerbelasë, 1.400 vjet më parë u masakruan nipi i profetit Muhamed, Imam Hyseni, së bashku me 72 shehid (dëshmorë).