Dita e Kujtimit të Viktimave, Ademi: Shkodranët përsëri të parët, për t’i prerë rrugën instalimit të monizmit…

Sot në Ditën Europiane e Kujtimit të Viktimave të Stalinizmit dhe Nazizmit, Kryetarja e Bashkisë Shkodër, Voltana Ademi duke kujtuar 45 vitet e vuajtjes nga persekucioni dhe dhuna e pashembullt e një regjimi diktatorial- stalinist në zemër të Europës, thekson se ishin Shkodra dhe shkodranët që nisën të parët në Europë rezistencën kundër kësaj bishe që nuk kursente askënd, nga foshnjat në barkun e nënës deri tek të moshuarit.

“Shkodra dhe shkodranët, përmes sakrificave të jashtëzakonshme, ishin shembull për të gjithë shqiptarët në këtë përballje të pabarabartë me shtetin diktatorial,” thekson në reagimin e saj Voltana Ademi përmes rrjetit social Facebook, duke i bërë të qartë atyre që po bëjnë përpjekje sot të instalojnë stalinizmin në Shqipëri me në krye Edi Ramën:

“Shkodra dhe shkodranët janë përsëri të parët sot për t’i prerë rrugën dëshirave perverse të individëve që tentojnë të rikthejnë në vendin tonë sistemet monisto- diktatoriale.”

Sot është Dita Europiane për Kujtimin e Viktimave të të gjitha Regjimeve Totalitare. Shkodra dhe shkodranët kujtojnë vuajtjet e sakrificat, të rënët dhe ata që mbijetuan, thekson Kryetarja e Bashkisë Shkodër në mesazhin e saj shoqëruar me një video kushtuar persekutimeve të klerikut të njohur shkodran Hafiz Ali Kraja, ndërsa përfundon:

“Shkodra dhe shkodranët janë krenarë për të djeshmen dhe të sotmen!”

Ndryshe, në vitin 2008 Parlamenti Evropian ka caktuar 23 Gushtin si Ditë kujtimi për Viktimat e Komunizmit dhe Nazizmit që përkon me ditën e nënshkrimit të paktit famëkeq Molotov-Ribentropp, midis Bashkimit Sovjetik komunist dhe Gjermanisë naziste, më 23 Gusht 1939, në bazë të të cilit Moska dhe Berlini kishin ranë dakord për mossulmim dhe ndarje midis tyre të Evropës Lindore, pasojat e të cili Pakt, Evropa i vuan edhe sot.