Dita e Kushtetutës Kosovës, Presidentja Osmani: Zbatimi i Kushtetutës përshpejton procesin integrues
Duke e konsideruar si normë supreme që përcakton identitetin dhe vlerat e shoqërisë demokratike, në Ditën e Kushtetutës së Kosovës, Presidentja Vjosa Osmani, vlerëson se Kushtetuta është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike
“Sot, në ditën e miratimit të Kushtetutës, e cila është normë supreme që përcakton identitetin dhe vlerat e shoqërisë sonë demokratike, rikonfirmojmë përkushtimin tonë institucional për zbatimin dhe afirmimin e këtyre vlerave,” shprehet Presidentja e Kosovës, Vjosa Osmani, në reagimin e saj përmes rrjetit social Facebook duke përfunduar:
“Kushtetuta jonë është udhërrëfyese, ndaj zbatimi pakompromis i saj na ndihmon dhe përshpejton procesin tonë integrues drejt familjes së madhe euroatlantike.”
Ndryshe, Kushtetuta e Republikës së Kosovës u miratua 16 vjet më parë, ditë kur filloi dhe një epokë e re për Kosovën e cila kishte shpallur pavarësinë më 17 shkurtit të vitit 2008; Deklaratë e cila më 22 korrik të vitit 2010 u vlerësua nga Gjykata Ndërkombëtare e Drejtësisë në Hagë se nuk ka shkelur të drejtën ndërkombëtare dhe se autorët e saj ishin duke vepruar në cilësinë e tyre si përfaqësues të popullit të Kosovës.
