Dita e Mbretit, Kurti: Populli ynë nuk e harron mbështetjen e Belgjikës në ditët e vështira

Duke e konsideruar Ditën e Mbretit Belg si simbol të unitetit dhe historisë së Belgjikës, Kryeministri Albin Kurti, në pritjen e organizuar nga Ambasada e Mbretërisë së Belgjikës në Kosovë, tha se kremten e kësaj feste të madhe për popullin belg, po e shënojmë duke theksuar miqësinë e madhe ndërmjet popujve tanë dhe duke shprehur mirënjohje për mbështetjen e Belgjikës ndaj Kosovës në ditët më të vështira të saj.

“Populli ynë nuk e ka harrur mbështetjen e Belgjikës në ditët më të vështira të tij, dhe lidhjet e miqësisë që krijuan atëherë, në viteve e ’80-ta dhe ’90-ta, vetëm sa janë forcuar në vitet dhe dekadat pas,”  u shpreh Albin Kurti duke shtuar se mijëra shqiptarë dhe qytetarë tjerë nga Kosova janë shtetas belgë që janë pjesë aktive e institucioneve shtetërore dhe shoqërore të Belgjikës.

“Lidhjet tona diplomatike janë më të ngushta se kurrë, tani që nga viti i kaluar kemi edhe ambasadorin me kompetenca të plota, Cuvelier por se pavarësisht kësaj duhet të punojnë edhe më shumë në përmirësimin e marrëdhënieve tregtare dhe ekonomike, duke u shprehur optimistë për të ardhmen e marrëdhënieve tona në të gjitha fushat, nga politika dhe ekonomia, deri te kultura dhe çështjet sociale,” tha Kryeministri Kurti duke falënderuarBelgjikën për mbështetjen e fuqishme të vazhdueshme ndaj agjendës evropiane të Kosovës.

Në përfundim të fjalës së tij, Kryeministri i Kosovës, Albin Kurti, uroi shtetin e Belgjikës dhe popullin belg në këtë festë shumë të rëndësishme të shënimit të Ditës së Mbretit belg, duke iu dërguar urimet më të ngrohta Mbretit Philippe, Mbretëreshës Mathilde, Princeshës Elisabeth, Princit  Gabriel, Princit Emmanuel dhe Princeshës Eleonore.

Ndryshe, këtë vit Belgjika shënon përvjetorin e 158-të i Ditës së Mbretit Belg.