Dita e Mësuesit, Berisha: Sot arsimi është në krizë, Akademia mes Tom Doshit dhe Skënder Gjinushit

Sot arsimi është në një krizë të jashtëzakonshme, tha Kryetari i Partisë Demokratike, Sali Berisha, në fjalën e tij në konferencën e organizuar nga Departamenti i Arsimit dhe Shkencës në PD, me rastin e 7 Marsit, Ditës së Mësuesit, duke u zotuar me këtë rast se me ardhjen e PD në pushtet përparësi absolute do jetë arsimi, ku do të rikthehet buxheti prej 5 për qind e më shumë.

Duke e pranuar përkufizimin i cili u dha në këtë konferencë për trajtimin e Arsimit nga kjo qeveri si shkencofobi, Kryetari i Partisë Demokratike tha se Akademia e Shkencave tregtohej mes Tom Doshit dhe Skënder Gjinushit ku Toma i blinte partinë Gjinushit, dhe Rama i jepte Akademinë!

“Së pari dëshiroj që nga ky takim t’u përcjellim urimet më të përzemërta të gjithë mësueseve dhe mësuesve, pedagogeve dhe pedagogëve, të gjithë mësuesve të sistemit parashkollor, në këtë ditë që mbarë kombi nderon mësuesin misionar si një misionar të tij të vërtetë.
Misioni i tyre, misioni juaj është i një rëndësie përcaktuese më shumë se çdo mision tjetër për të ardhmen e një kombi.

Ne vijmë sot në këtë ditë në kushtet e një krize të jashtëzakonshme të sistemit arsimor, të një rrokullisje të këtij sistemi shumë më të madhe se ajo që shohim në rrugë dhe urat e ndërtuara nga kjo qeveri.
Ju bëtë diskutime shumë të përgjegjshme dhe u falenderoj shumë për ekspozetë që bëtë, por në rast se përpiqemi të kuptojmë shkaqet e kësaj gjendje katastrofale në arsim ato janë të mirëfillta antikombëtare.
Dhe është naivitet në qoftë se ne nuk i vlerësojmë të tilla.
Nuk mund të ketë akt më antikombëtar se sa të bllokosh me një urdhër doktoraturat në universitete.
Do t’u them këtu, 46 vite më parë, jo doktoraturat e kolegëve të mi, por doktoratura të studentëve të mi, sepse në atë kohë studentët kishin të drejtë ose të jepnin provimin e shtetit, ose të mbronin një tezë, pra tezat e studentëve të mi unë i kam paraqitur në kongreset më prestigjioze ndërkombëtare, sepse ato të atilla ishin.
Dhe kjo jo vetëm unë, por jam i sigurt edhe kolegë të tjerë.
Pra, jo doktoraturat e mjekëve, por të studentëve, me studimet eksperimentale, ato ishin të këtij niveli.
Dhe erdhi një frymë e paimagjinueshme.
E thatë bukur ju, shkencofobie, ku akademia tregtohej mes Tom Doshit dhe Skënder Gjinushit.
Skënder Gjinushi i jepte partinë Tom Doshit, Tom Doshi blinte partinë dhe Rama i jepte akademinë.
Ju, këtu përcaktuat me shumë përgjegjësi problematikat më të mëdha të arsimit parauniversitar, të arsimit profesional, të arsimit universitar.
Por përcaktimet tuaja, konstatimet tuaja korrespondojnë plotësisht me të gjithë vëzhgimet ndërkombëtare për arsimin në Shqipëri.
Nuk ka rënie më të madhe ky komb se sa rënia që pësoi në PISA, 69 pozicione.
Kur ndodhi kjo? Sapo nga 9 vite, këtyre u përkisnin 8 vite. Sepse PISA merr 8 vite. Zbritja katastrofale.
Nuk na shërben për gjë e shkuara, por për diçka po. Na shërben si një bazë për të ndërmarrë veprime për të ardhmen. Platformën për të ardhmen.
Një gjë u siguroj, PD e shpalli arsimin përparësi absolute.
Dhe ai është dhe duhet të jetë procesi më serioz i një kombi.
E filluam me mësuesin.
E vendosëm në piedestal në kuptimin që mësuesin e ngritëm në shkallaren e rrogave në një të tretën e sipërme nga një e treta e poshtme që ishte.
Ju jeni dëshmitarë për të investimet që u bënë. Në PISA pati ngjitje vertikale.
Po këto ishin vetëm fillime.
Por ama, nga 6 mijë pedagogë, kaluam në 11 mijë. Universitetet duhet të ishin streha intelektuale e kombit, e studiuesve, e kërkuesve shkencorë.
Pra, u investua në shumë drejtime.
26 mijë kompjuterë u shpërndanë në të gjitha shkollat. 800 kishte gjithsej dhe e blinin me satelit internetin,” tha Sali Berisha duke u zotuar se me ardhjen e PD në pushtet, PD do rikthehet tek buxheti për Arsim prej 5 për qind ose dhe më shumë.

“Pra, gjithçka shkoi në një degradim të madh. Arsimi në të gjitha nivelet, në të gjitha ciklet.
Asnjë pushtues nuk do mund ta shkatërronte në 11 vite kaq shumë sa e ka shkatërruar ky regjim.
Sot, në vitin 2025 në shkollat tona kishte 405 mijë nxënës. Në vitin 2013 kishte 801 mijë nxënës.
Pra, 49 për qind më pak në 11 vite. Pa luftë civile. Pa kalamitete kombëtare, veçe me politikat shpopulluese të Çubrilloviçit, në të cilat është edhe shkatërrimi i arsimit.
U përmend këtu se nga Kukësi shkojnë në Prizren, sepse në çdo gjë Kosova është shtet, nuk është narkoshtet. Nuk është shtet i pasur, por është shtet dhe mban qëndrimin që një shtet duhet të mbajë ndaj arsimit, bujqësisë, shëndetësisë.
U them unë, e gjithë zona nga Kalaja e Dodës gjer në Valbonë shkojnë dhe mjekohen në Gjakovë dhe Prizren sepse është shtet dhe jo një mafie e tmerrshme si kjo këtu. Imagjinoni ju.
Ndaj dhe ju siguroj se PD do të ketë përparësi absolute arsimin dhe në qoftë se bëhet fjalë nga do ta nisim ne rindërtimin, nga arsimi do niset. Pa rindërtuar arsimin, nuk ka hap të vërtetë përpara.
Do ta nisim përsëri me mësuesin duke e vendosur atë në piedestalin që meriton. Meriton respektin, nderimin. Meriton shpërblimin për misionin që ka. Dhe ne i rikthehemi kësaj fuqishëm.
Sikundër ne i rikthehemi me një buxhet 5 përqind apo më shumë investimit në modernizimin e këtij sistemi në të gjitha aspektet.
Nuk ka akt më armiqësor se sa të godasësh kërkimin shkencor në universitete. Një pedagog pa kërkim shkencor nuk ka vlerë dhe kërkimi shkencor duhet të jetë testi më kryesor për qenien e tij pedagog ose jo. Por që të bësh këtë duhet të krijosh kushte.
Sot është e pamundur. 50 vite më parë ishte zëvendësdekani që na firmoste të gjitha dokumentet për projektin shkencor. Dhe ato kushtonin se ishin kimikate, lepuj, minj, kavie. Ai kishte kompetencën.
Tani duhet ministria. Duhen xhahilët. Injorantët, hajdutët. Si mundet,” tha lideri i opozitës duke i bërë thirrje çdo intelektuali të shpallë armiqësi ndaj këtij regjimi!

“Por, miqtë e mi, Ernest Heminguej ka shkruar njëherë se shkrimtari duhet të luftojë me pendë, por duhet të luftojë edhe me pushkë dhe këtë deklaratë e bëri në një kongres të shkrimtarëve amerikanë.
Unë nuk mendoj dhe nuk besoj dhe jam kundër luftës me pushkë në këto kushte.
Por ka një kusht të të gjitha kushteve, që çdo intelektual i vërtetë duhet të shpallë armiqësi ndaj këtij regjimi.
Kemi humbur në 11 vite 49 përqind të të gjithë nxënësve parauniversitare. Pa mendoni pak me këto ritme ku do jemi pas 11 vitesh?
Shqipëria po shuhet para syve tanë dhe ne po sodisim. Dhe kjo është ikje me familje. Kur nxënësit janë kaq, imagjinoni ju sa janë prindërit e tyre. Ne mund të rreshtojmë bashkë qindra probleme të këtij regjimi.
Mund të paraqesim këtu të gjitha alternativat e zgjidhjes, por të gjitha këto mbeten fjalë sa kohë qëkëta janë në pushtet. Dhe çdo ditë që kalon, vendi shkon poshtë e më poshtë.
Vijmë tani tek thelbi ynë. Cili është thelbi i një intelektuali? Thelbi i një intelektuali është mbrojtja e interesit publik. Intelektuali nuk duhet të bëhet kurrë anëtar i shumicës së heshtur. Nuk duhet t’i lejojë vetes të jetë anëtar i shumicës së heshtur sepse shumica e heshtur është shtrati i çdo regjimi çnjerëzor.
Por, të vetmit që nuk i takon të jetë anëtar i shumicës së heshtur është intelektuali sepse ai i njeh problemet.
Ti nuk mund të akuzosh një njeri që nuk po reagon ndaj një grushti shteti sepse nuk je i sigurt që ka kulturën e duhur për të parë apo jo nëse është veprim antikushtetues. Por intelektuali po, njeriu i dijes po.
Dhe ju them një gjë, Albert Ajnshtajni me të drejtë ka thënë, për intelektuali rreziku i konformizmit është më i madh se rreziku nuklear.
Ndaj dhe sot kërkohet zgjidhje. Dhe zgjidhja është një përpjekje e përgjithshme e intelektualëve, e studentëve, e nxënësve kundër këtij regjimi.
Do u tregoj një gjë. Dy muaj më parë, në Bullgari, një javë rresht protesta. Qeveria dha dorëheqjen.
Po pse e dha dorëheqjen? E dha dorëheqjen se ka një kod. Në qoftë se populli të akuzon për vjedhje, ti nuk ke alternativë tjetër vetëm t’i provosh që nuk ke vjedhur.
Na akuzuan në vitin 1997 për vjedhje të parave të piramidave. Absolutisht ky ka qenë motivi kryesor që ne dorëzuam pushtetin. U thashë bashkëpunëtorëve të mi, gjersa njerëzit janë të bindur që i kemi marrë paratë, që nuk i kemi marrë, por kjo duhet të provohet. Duhet t’u provojmë shqiptarëve se nuk kemi prekur një qindarkë nga paratë e tyre. Pra, rregullat e demokracisë janë të tilla.
Në Tiranë, superskandale, dhe po të mos ishte protesta, ne do ishim një komb i poshtëruar. Po kjo qeveri kërkon angazhimin masiv të qytetarëve. Është tejkaluar, është bërë banale kjo, vija e kuqe, vija e kuqe, por në fakt është tejkaluar çdo vijë e kuqe me të.
Në fakt, ose duhet t’i dalim zot jo me armë, me protestë.
Ndaj dhe ne, në qoftë se ne shpallim armiqësi ndaj kësaj qeverie dhe jo të themi qeveria jonë, armikja jonë është kjo, sepse këtë qëndrim që mban kjo, nuk e mban një pushtues.”

Në fund, Kryetari i Partisë Demokratike tha në konferencën e organizuar nga Departamenti i Arsimit dhe Shkencës në PD, me rastin e Ditës së Mësuesit, se nxënësit dhe studentët duhet të jenë në ballë të kësaj lëvizje, këto janë momente vendimtare për kombin.

“Vini re ju, merrni pak Durrësin. U përmbytën 6 mijë shtëpi në kushtet më të mjera. Asnjë qindarkë gjer sot, ndaj dhe nuk u shpall gjendja e jashtëzakonshme, që Kushtetuta, ligji e detyron të shpallë gjendje të jashtëzakonshme. Jo. U kalua.
U them një gjë tani. Ditën e parë dolën, ditën e dytë nuk dilnin në protestë nga frika. Atëherë duhet të dalim. Duhet t’ua heqim frikën. Duhet të bëjmë gjithçka që nxënësit tanë, studentët të jenë në ballë të kësaj lëvizje. Janë momente shumë vendimtare për kombin.
Shikoni se çfarë bën, del ajo, është bërë figurë e zezë në të gjithë botën, nuk ka media e madhe pa e lakuar Belinda Ballukun, Lubi Ballukun. Të gjitha mediat e botës. Nuk ka ngelur kancelari në botë që nuk e ka emrin e saj dhe dilte dje serbes-serbes dhe bënte ndarjen si heroinë e tyre.
Po natyrisht midis hajdutëve, ai që vjedh më shumë është hero. Dhe ata e duartrokisnin,” tha Kryetari i Partisë Demokratike, Sali Berisha, duke përfunduar:
“Ndaj dhe e shfrytëzoj këtë takim me ju për një thirrje për të gjithë intelektualët, nuk duhet të harrojmë kurrë se thelbi i ynë është mbrojtja e interesit publik.
Sot kemi 1001 arsye për t’’i dalë zot interesit publik më shumë se të tjerët.
Edhe njëherë gëzuar këtë ditë dhe faleminderit shumë.”