Dita e Pavarësisë Kosovës, Presidentja Osmani: Urime 14 vjetori i shtetit tonë!
Sot në orën 08:00 me ngritjen solemne të flamurit të Republikës së Kosovës, nisën aktivitetet për shënimin 14-vjetorit të shpalljes së Pavarësisë. Ceremoni ku morën pjesë presidentja e Kosovës, Vjosa Osmani, kryetari i Parlamentit, Glauk Konjufca, kryeministri, Albin Kurti, ministri i Mbrojtjes, Armend Mehaj dhe komandanti i FSK-së, Bashkim Jashari.
“Në katërmbëdhjetë vjetorin e pavarësisë së shtetit të Kosovës i kujtojmë me përulësi të gjithë ata që sakrifikuan për lirinë dhe pavarësinë e Republikës së Kosovës.
I kujtojmë dhe nderojmë në këtë ditë vizionarët dhe heronjtë. Përkushtimi i tyre për lirinë e vendit është përgjegjësi e jona për të tashmen dhe të ardhmen e vendit.Faleminderit prijësit të urtë e arkitektit të pavarësisë, presidentit dr.Ibrahim Rugova, faleminderit vajzave e djemve të UÇK-së në krye me legjendarin Adem Jashari me familje dhe faleminderit NATO dhe shteteve mike që e bën të mundshme lirinë dhe shtetin tonë!” u shpreh Presidentja e Kosovës me këtë rast duke përfunduar:
“Qytetarë të Republikës, urime 14 vjetori i shtetit tonë! Na duhet angazhim i përbashkët që ta përmbyllim rrugëtimin tonë për në familjen evropiane. Shteti i Kosovës është mbi të gjitha, e paçim përjetë!”
Në nder të 14-vjetorit të pavarësisë janë organizuar një sërë aktivitetesh ku në orën 09:00 krerët shtetëror bënë homazhe në kompleksin memorial në Prekaz, pastaj tek varri i ish presidentit të Kosovës, Ibrahim Rugova, veprimtarit, Adem Demaçi.
Në orën 11:00 Parlamenti i Kosovës mbajti seancë solemne për nder të ditëlindjes së 14 të pavarësisë së Kosovës.
E në orën 12:00 në sheshin “Nënë Tereza” u bë parakalimi i kuadrateve të FSK-së dhe të Policisë së Kosovës.
Shpallja e Pavarësisë së Kosovës është bërë më 17 shkurt të vitit 2008 në orën 15:39 në Kuvendin e Republikës së Kosovës. Në një mbledhje të jashtëzakonshme ku merrnin pjesë 109 deputet nga gjithsej 120, Kuvendi i Kosovës shpalli njëzëri Kosovën shtet të pavarur, sovran dhe demokratik.
Deklarata e pavarësisë së Kosovës dhe shpallja e pavarësisë ishte bërë nga kryeministri i kohës, Hashim Thaçi, ndërsa president atë kohë ishte, Fatmir Sejdiu.
