Dita e Pavarësisë, Vjosa Osmani: Vlerat e popullit amerikan, frymëzimi ynë i përhershëm!
Për nder të Ditës së Pavarësisë së SHBA, vendit me të cilin ne i ndajmë të njëjtat vlera dhe jetojmë në paqe të qëndrueshme e në miqësi të përhershme, në oborrin e Kuvendit të Kosovës, kryetarja Vjosa Osmani së bashku me Ambasadorin e Shteteve të Bashkuara në Kosovë, Philip S. Kosnett, ngritën flamurin amerikan, në shenjë falënderimi e respekti ndaj popullit amerikan dhe demokracisë amerikane.
“Vlerat e popullit amerikan, të theksuara në Deklaratën e Pavarësisë së SHBA-ve, nga e cila është frymëzuar edhe Deklarata jonë e Pavarësisë, janë frymëzim yni i përhershëm,” tha Kryetarja e Parlamentit të Kosovës në urimin e saj pas ngritjes së flamurit të SHBA i cili do të qëndroj aty deri më 6 Korrik.
Ndërkohë Presidenti Hashim Thaçi, pëemes rrjetit social Facebook shprehet se populli i Kosovës është përjetësisht falënderues për mbështetjen amerikane në kohërat më të vështira dhe për mbështetjen e vazhdueshme në rindërtimin e vendit tonë.
“Ky 4 korrik shënon përvjetorin e 244-të të Pavarësisë së SHBA-së, vendit më demokratik në botë. Urimet më të sinqerta për popullin dhe institucionet amerikane në emër të popullit dhe institucioneve të Kosovës. Ne ndajmë vlera, parime dhe vizion të përbashkët për një botë të lirë, të drejtë dhe demokratike.
Populli i Kosovës është përjetësisht falënderues për mbështetjen amerikane në kohërat më të vështira dhe për mbështetjen e vazhdueshme në rindërtimin e vendit tonë.
Zoti e bekoftë miqësinë me Shtetet e Bashkuara të Amerikës! HTH”
Ndërsa Kryeministri i tij Avdullah Hoti në mesazhin e tij për nder të Ditës së Pavarësisë së SHBA tha se kjo ditë është sinonim i lirisë, përparimit dhe shpresës për vendet demokratike në mbarë botën.
“Mesazhi i fuqishëm amerikan i lirisë sot simbolizon ëndrrën e madhe të të gjitha kombeve për liri dhe demokraci, për paqe dhe dinjitet të gjithëmbarshëm. Jehona e këtij mesazhi të madh ka prekur zemrat dhe mendjet e qytetarëve të Republikës së Kosovës, për të cilët populli dhe qeveria amerikane kanë qenë dhe do të mbeten gjithmonë simbol i frymëzimit për liri, pavarësi dhe demokraci.”
Ndryshe, sot SHBA feston 244-vjetorin e pavarësisë.
