Dita e Përkujtimit të Holokaustit, Osmani: Kundër antisemitizmit, urrejtjes dhe racizmit, sot dhe çdo ditë!

Pasi bëri homazhe te pllaka përkujtimore për hebrenjtë që u zhdukën në kampet e nazistëve gjatë Holokaustit, Presidentja e Kosovës, Vjosa Osmani tha në Ditën Ndërkombëtare të Përkujtimit të Holokaustit se duhet të vazhdojmë të qëndrojmë kundër antisemitizmit, urrejtjes dhe racizmit, sot dhe çdo ditë.

Kjo ditë, tha Presdentja Osmani, shërben si një kujtesë e mizorive të kryera gjatë një prej periudhave më të errëta të historisë dhe shërben si një thirrje për veprim për të gjithë ne për të kujtuar dhe nderuar viktimat e Holokaustit.

“Nuk duhet të harrojmë asnjëherë mizoritë e së kaluarës dhe duhet të vazhdojmë të qëndrojmë kundër antisemitizmit, urrejtjes dhe racizmit, sot dhe çdo ditë,” tha Presidentja e Kosovës, Vjosa Osmani pasi bëri homazhe duke përfunduar:

“Është e rëndësishme që t’i kujtojmë edhe veprimet e shqiptarëve gjatë Holokaustit, të cilët mirëpritën refugjatët hebrenj me krahë hapur, duke dëshmuar dhembshurinë dhe humanizmin. Kjo shërben si një kujtesë për fuqinë e mirësisë përballë së keqes.”

Ndryshe, Asambleja e Përgjithshme OKB-së caktoi 27 janar si Ditën Ndërkombëtare të Përkujtimit të Holokaustit, datë e cila përkon me përvjetorin e çlirimit të kampeve të vdekjes Auschvitz-Birkenau në vitin 1945.