Dita e pestë e protestës, policia arreston 4 persona dhe 46 i procedon në gjendje të lirë

Pas ditës së pestë të protestës kundër vrasjes së 25-vjeçarit Klodian Rasha nga policia, sot policia bënë të ditur se ka arrestuar 4 persona dhe 46 i ka proceduar në gjendje të lirë.

Policia thotë se protesta e djeshme ishte e paligjshme dhe u shoqërua me goditje me gurë, lëndë piroteknike dhe sende të forta ndaj punonjësve të policisë si dhe gjatë marshimit me dëmtim të kazanëve të mbeturinave, sinjalistikës rrugore dhe vendstacioneve të mjeteve të transportit publik.

Ndryshe, përkundër deklaratës së policisë, dje protesta ishte paqësore deri tk Drejtoria e Policisë, ku marshimi i protestuesëve u ndërpre me ujë me presion, gaz lotjsjellës dhe shpërndarje të dhunshme të protestës që irritioi masën e tubuar dhe gjithçka doli jashtë kontrollit ashtu si dhe sjellja kriminale e policëe edhe ndaj minorenëve.

Nuk ishte e qartë pse por ky represion policor vazhdoi edhe kur protesta u konsiderua e mbyllur, madje shumica e shoqërimeve u bënë tek Zogu i Zi ndërsa të rinjtë po ktheheshin në shtëpi.

Njoftimi nga policia

Tiranë
Organizuan grumbullim dhe manifestim të paligjshëm, shkatërruan pronën publike dhe private, plagosën 1 punonjës policie arrestohen në flagrancë 4 shtetas, si dhe procedohen në gjendje të lirë 46 shtetas të tjerë.

Me date 13.12.2020, në Sheshin “Skenderbej” nisi një tubim i paligjshëm, i cili vazhdoi më pas në drejtim të godinës së Kryeministrisë, në afërsi të DVP Tiranë, në drejtim të “Bllokut” dhe disa më pas të ndarë me grupe janë kthyer sërisht në Sheshin “Skëndërbej” dhe duke vazhduar më tej në rrugën e Durrësit, rrugën “Dritan Hoxha” dhe Sheshit Shqiponja, ku kanë dëmtuar gjatë rrugës së përshkruar kazanët e mbeturinave, sinjastikën rrugore, reklamat e bashkisë dhe vendstacionet e mjeteve të transportit publik.

Si pasojë e goditjes me gurë, lëndëve piroteknike dhe sendeve të forta në drejtim të punonjsve të policisë të planizuar me sherbim, është dëmtuar një punonjës policie.

Më pas, në përfundim të veprimeve procedurale janë arrestuar në flagrancë 4 shtetas, si dhe u proceduan penalisht në gjendje të lirë 46 të tjerë, për kryerjen e veprave penale “Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës ” , ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike’’.

Ndërkohë, vijon puna për identifikimin dhe kapjen e personave të tjerë të përfshirë në veprime të dhunshme ndaj Policisë, pronës shtetërore dhe asaj private.

Policia e Tiranës apelon për respektim në maksimum të masave kufizuese, me qëllim parandalimin e përhapjes së COVID-19, si dhe u bën thirrje qytetarëve që problematiken dhe shqetësimin që kanë ta adresojnë pranë institucioneve dhe organeve kompetente, pa krijuar grumbullime, pasi grumbullimet dhe tubimet janë në shkelje të Aktit Normativ për parandalimin e pandemisë COVID -19.