Dita e të Drejtave të Njeriut, IFJ: Gazetarë të vrarë, 40 për qind më shumë se në vitin 2021

Numri i gazetarëve të vrarë ndërsa ishin duke kryer misionin e tyre gjatë vitit 2022 është rritur për mbi 40 për qind në krahasim me vitin e kaluar, thekson Raporti i Federatës Ndërkombëtare të Gazetarëve, IFJ, i cili u publikua me rastin e Ditës Ndërkombëtare të të Drejtave të Njeriut.

Federata Ndërkombëtare e Gazetarëve thekson se 67 profesionistë të mediave janë vrarë në punë gjatë këtij viti, në krahasim me 47 sa ishin në vitin e kaluar, që është një kthesë e madhe pas rënieve që ishin shënuar vitet e fundit.

“Rritja e numrit të vrasjeve të gazetarëve dhe punonjësve të tjerë mediatik është arsye serioze për shqetësim dhe një thirrje për zgjim të qeverive në gjithë botën, që të marrin masa për mbrojtjen e gazetarisë, njërës prej shtyllave kryesore të demokracisë,” tha Sekretari i Përgjithshëm i IFJ, Anthony Bellanger.

Lufta në Ukrainë, trazirat qytetare në Haiti, si dhe veprimi i grupeve kriminale në Meksiko, kanë kontribuar në masën më të madhe, në rritjen e numrit të vrasjeve, shprehet organizata e gazetarëve me seli në Bruksel e cila përfaqëson rreth 600.000 gazetarë nga 146 shtete.

Vendi me numrin më të madh të vrasjeve të personelit mediatik ishte Ukraina, me 12 raste të raportuara të vrasjeve, deri sa Amerika Veriore dhe Jugore ishin zonat me numrin më të madh të vrasjeve, me 29 raste të raportuara të vrasjeve.

Raporti i cili u publikua me rastin e Ditës Ndërkombëtare të të Drejtave të Njeriut, tregon gjithashtu për rritje të dhunës politike dhe dëshmon për të paktën 375 gazetarë të arrestuar për shkak të detyrës, që është 10 më shumë se vitin e kaluar.

Ndër shtetet me dhunë të theksuar ndaj gazetarëve veçohen, Kina, Mianmari, Turqia, Irani dhe Bjellorusia.