Dita e Verës, Berisha në Elbasan: Festën tjetër, të keqen do ia lëmë dimrit!

Duke uruar nga Elbasani, Ditën e Verës, Kryetari i Partisë Demokratike, Sali Berisha, tha se sot këtë festë shqiptarët e festojnë më të bindur se kurrë se festën tjetër të keqen ia lanë dimrit dhe Rama me Lubinë të ardhme nuk kanë më.
“Së pari, qytetarëve, banorëve të Elbasanit, sot si kryeqyteti i festës për mbarë kombin, u uroj gëzuar Ditën e Verës, festën më të lashtë jo vetëm të shqiptarëve ç’është e vërteta, por edhe të kombeve të tjera, një ditë që ngjall shpresë, frymëzon ripërtëritje, një ditë pra gëzimi.
Dhe sot këtë festë shqiptarët e festojnë më të bindur se kurrë se festën tjetër të keqen ia lanë dimrit dhe Rama me Lubinë të ardhme nuk kanë më. Kjo është dita e fundit e verës që ata i gjen me karrige të thyer ashtu siç janë,” tha Sali Berisha në urimin e tij për Ditën e Verës nga Elbasani duke përfunduar:
“Ndaj dhe le të urojmë që ditën e ardhshme të verës, qytetarët e Elbasanit dhe mbarë Shqipërisë ta festojnë siç ua do zemra, ta festojnë me dyer të hapura drejt të ardhmes dhe drejt Europës.
Është e trishtë dhe e dhimbshme se në 34 vite kjo është dita e parë e verës në të cilën dyert e Europës u mbyllën për shqiptarët për shkak të veprimeve të pashembullta në historinë e vendeve që shkojnë drejt integrimit nga dyshja Rama-Balluku.
Ndaj dhe le të urojmë dhe të punojmë që dita tjetër e verës të na gjejë sa më afër ëndrrës tonë evropiane.”

Ndërkohë në një takim me përfaqësuesit e familjeve të Elbasanit për nder të Ditës së Verës, Kryetari i Partisë Demokratike siguroi se vitin tjetër do festojnë me dyert e Europës të hapura

“Është një nder shumë i veçantë për mua t’u takoj ju, përfaqësuesve të familjeve të këtij qyteti të bekuar, këtij qyteti që ka qenë burim drite dhe frymëzimi, dhe mbetet, për shqiptarët.
Dita e Verës është dita e shpresës, dita e ndryshimit dhe fakti që ju e festoni këtë ditë më shumë se të gjithë shqiptarët dhe në mënyrën më të merituar, jeni sot kryeqyteti i vërtetë i festës dhe i kombit, dëshmon për dëshirën tuaj për ndryshim, dëshmon shpresën e pashuar të qytetarëve të këtij qyteti për një kohë më të mirë, për një ditë më të mirë, për një të ardhme më të mirë.
Unë kam shumë mirënjohje ndaj jush për të gjithë mbështetjen që ju i keni dhënë dhe i jepni PD-së, opozitës.
Ne e kremtojmë këtë ditë në kushte më të pazakonta krahasuar me të gjithë të tjerat, sepse e vërteta është se java para kësaj dite shënoi de facto mbylljen e dyerve të ëndrrës tonë evropiane, të integrimit tonë në BE.
Pra, këta që sot janë në pushtet apo ky që kryeson këtë organizatën qeveritare kriminale, ky për interesa të veta mbylli dyert dhe tani ka filluar betejën me armiqtë e brendshëm dhe të jashtëm në stilin e etërve të tij,” tha Kryetari i Partisë Demokratike, Sali Berisha, para përfaqësuesve të familjeve elbasanase duke përfunduar:
Por Dita e Verës është dita e ndryshimit, është dita e ripërtëritjes, kështu që ne ecim të sigurt se ditën tjetër të verës do ta bëjmë shumë më mirë. Do t’i kemi dyert e ëndrrës tonë evropiane të hapura.
Ju uroj dhe u falënderoj shumë për këtë pritje të ngrohtë. U uroj shumë suksese.
Festë paçi gjithmonë!”