Ditë zie për vdekjen e katër fëmijëve në Pazar të Ri

Autoritetet e qytetit të Pazarit të Ri në Serbi, shpallën sot ditë zie, për shkak të vdekjes tragjike të katër fëmijëve në një zjarr.

Me këtë vendim, raporton RFE, të gjithë flamujt u ulën në gjysmështizë, objektet e hotelerisë nuk transmetojnë muzikë, ndërsa ngjarjet argëtuese u shtynë.

Katër fëmijë të moshës gjashtë muaj deri në pesë vjeç vdiqën në një zjarr të dielën.

Babai i tyre pësoi djegie në 50 për qind të trupit dhe u transportua në Qendrën Klinike të Serbisë në Beograd, ndërsa nëna u shtrua në Spitalin e Përgjithshëm në Pazar të Ri, njoftoi Radiotelevizioni i Serbisë, RTS.

Zjarri shpërtheu mëngjesin e së dielës në një ndërtesë banimi në Novi Pazar.

Ministria e Punëve të Brendshme e Serbisë tha se zjarrfikësit, menjëherë pas marrjes së informacionit, kanë shkuar në vendin e ngjarjes.

Në njoftim thuhet se zjarrfikësit, me të hyrë në ambientet e përfshira nga zjarri, kanë gjetur katër fëmijë, të cilët, sipas të gjitha gjasave, kanë vdekur nga ngufatja me tym, ndërsa babai dhe nëna kanë mbetur të lënduar në dhomën ngjitur.

Zjarri është lokalizuar dhe më pas është fikur me shpejtësi, raporton RFE, ndërsa hetimet do t’i përcaktojnë shkaqet e zjarrit dhe asfiksimit të fëmijëve, thuhet në njoftimin e ministrisë serbe të Punëve të Brendshme.

“Vdekja e fëmijëve është tragjedia më e tmerrshme, që prek gjithë shoqërinë,” tha ministria për Kujdes Familjar dhe Demografi e Serbisë.