Ditët e Shqipes, 26 vjet nga Beteja e Koshares

Sot shënohet 26 vjetori i Betejës së Koshares, një prej betejave më të rëndësishme dhe më të suksesshme të Ushtrisë Çlirimtare të Kosovës gjatë luftës së Kosovës.

Më datën 9 prill 1999, në kuadër të operacionit “Shigjeta”, Brigada 138 e UÇK-së në krye me komandantin Agim Ramadani luftoi me ushtrinë okupatore serbe për të thyer kufirin mes Kosovës dhe Shqipërisë. Përveç marrjes së kontrollit të kufirit, Beteja e Koshares kishte rëndësi të veçantë në krijimin e një rrjeti të qëndrueshëm të mbështetjes dhe logjistikës për UÇK-në.

Kjo betejë ishte e ashpër dhe e përgjakshme, por UÇK-ja arriti të fitojë betejën duke dëshmuar vendosmëri dhe guxim në front. Si pasojë, kjo betejë u bë motiv për rritjen e numrit të vullnetarëve që u bashkuan me radhët e UÇK-së për të luftuar për lirinë e vendit.

Në përvjetorin e Betejës së Kosharës, Këshilli Organizativ i shoqatës së ish Brigadës 138 “Agim Ramadani”, organizon manifestimin “Ditët e Shqipes”, nën kujdesin e Presidentes së Kosovës Vjosa Osmani.

Për të shënuar këtë ditë do të mbahen homazhe, kurse manifestimi qendror “Ditët e Shqipes” mbahen në Kompleksin Memorial në Koshare.

Për të nderuar të rënët, kryeministri në detyrë, Albin Kurti, do të bëjë homazhe dhe vendos kurora me lule fillimisht në Kompleksin Memorial “Dëshmorët e Koshares” e më pas pranë lapidarit të ngritur në Lagje të Re, në Rakoc si dhe në Kompleksin Memorial “Varrezat e Dëshmorëve” në Kaçanik.

Ndryshe, në Betejën e Koshares ranë 114 Dëshmorë të Kombit ndërsa te “Lagjja e Re” dhe Rakoc ranë 28 dëshmorë dhe 32 martirë në Kaçanik.