Djali përdhunues i deputetit PS/ Pushteti i Edi Ramës dhe viktima, dështuan për të hedhur poshtë aktin kriminal…

Një aparat i tërë shtetëror me në krye Edi Ramën dhe së fundi vetë viktima, Xhisiela Maloku, dështuan për të bindur opinionin shqiptar se atë që bëri djali i deputetit Rrahman Rraja nuk ishte përdhunim.

Duke i veçuar një hapsirë mediatike në dy emisionet më të rëndësishme në vend, Opinion dhe Open,  e përdhunuara Xhisiela Maloku u paraqit me rrëfimin e saj në TCH dhe Klan duke përgënjeshtruar veten e saj dhe duke “e pranuar” se dëshmia e saj ishte e rreme.
Në  “Opinion”, ku u pa se ishte nën presion të paparë, ajo ka mohuar gjithçka nga denoncimi për dhunë që kishte bërë për Rrexhep Rrajën, djalin e deputetit socialist Rrahman Rraja. Ajo tha se në 19 korrik shkoi rastësisht në hotel me të ndërsa denoncimin e bëri nga xhelozia, pasi Rraja shkoi me një femër tjetër me pushime. Xhisiela tha së në takimin mes tyre Rrexhepi, vetëm e ka qëlluar një herë me shpullë.

“Unë nuk kam djegie më cigare. Kam bërë një aksident,” tha ajo ndërkohë e pyetur se përse më pas ajo e tërhoqi denoncimin, Xhisiela tha se e bëri ngaqë arriti të rregullonte marrëdhëniet me ish-të dashurin.

“Pra i bie që jeni tallur me policinë,” ishte reagimi i gazetarit Blendi Fevziu.

“Po”,  u përgjigj Xhisiela, duke shtuar se nuk ka qenë kurrë e kërcënuar e madje se Rexhepi i kishte ofruar mbështetje.

Xhisiela Maloku ka rrëfyer në studion e emisionit Opinion se askush nga fisi Rrahja nuk e ka kërcënuar dhe se denoncimi në polici është kryer për shkak të xhelozisë. Sipas saj, denoncimi u tërhoq pasi me datë 21 ata u pajtuan.

Ndërkohë në emisionin “Open” të Eni Vasilit, 25-vjeçarja Xhisiela Maloku tha se dëshmia e publikuar nga ish-polici Emiljano Nuhu është e pavërtetë pasi ajo nuk e ka bërë atë rrëfim.

“Dëshmia që Emiljano Nuhu ka nxjerrë është ajo që ka nxjerrë Emiljano. Nuk është dëshmia e ime. Ajo që unë kam thënë është në prokurori. Në 19 korrik u takuam me kërkesë të Rrexhepit. Vetëm një shuplakë më ka dhënë,” tha Xhisiela ndërsa e pyetur nëse ajo është qëlluar me pistoletë, me grushta dhe është djegur me cigare,ajo ishte e prerë:

“Nuk është dëshmia ime. Disa gjëra i kam deklaruar nga xhelozia dhe nga inati. Kam bërë dëshmi të rreme. E kam bërë nga inati sepse Rrexhepi më kërkoi falje dhe shkoi me pushime me një tjetër”.

Akt ekspertiza thotë se ka pasur dhune ndaj jush? Këtë nuk mund ta mohosh, ndërhyri gazetarja.

“Nuk e di kush ma bëri ekspertizën. Po të shohësh në trupin tim janë akoma ato shenja. Është një aksident në makinë që kam bërë në Fier. Dhe ndaj i kam ato shenja në krah. Po shkonim në makinë në Patos dhe bëmë aksident. Djegiet me cigare i kam bërë vetë. Edhe Rrexhepi i ka bërë vetë djegie me cigare në dorë. Sa herë ziheshim nga inati digjnim veten,” tha Xhisiela.

Ndërkohë e pyetur nëse i kishin bërë presion, Xhisiela u përgjigj:

“Jo. Nuk kam pasur kërcënim. Nuk jam e kërcënuar. Nuk jam dhunuar. Vetëm për një inat e sipër është bërë gjithë ky shou mediatik. Nuk është e vërtetë që më ka dhunuar. Më ka qëlluar vetëm një herë me shpullë. E di që kam bërë kallëzim të rremë. Do të marr përsipër pasojat sepse janë përmendur emrat e shumë njerëzve të pafajshëm si babai i Rrexhepit.”

Dhe derisa në emisionin “Open” të Eni Vasilit po transmetohej intervista të cilën e kishte dhënë dje në Durrës, dhe në “Opinion” të Fevziut po vazhdonte intervista, ajo vendosi ta braktis studion dhe përpjekjen për të bindur opinionin shqiptar se nuk ishte përdhunuar. Për gazetarët të cilët po i bënin pyetje pa fund për të zbardhur të vërtetën ajo papritmas dha një përgjigje përfundimtare:

“Të vërtetën e di unë, do ta them atje ku duhet. Kjo është dalja e fundit publike imja!”