Dje dekoroi kriminelin komunist, sot Presidenti Ilir Meta nderon viktimat e Masakrës së 2 Prillit

Dje dekoroi kriminelin komunist Mehdi Bushati por kjo nuk e pengoi Presidentin e Repubikës, Ilir Meta, që sot të shfaqet në ceremoninë përkujtimore të Masakrës së 2 Prillit në Shkodër ku u vranë 4 protestues nga regjimi komunist.

Presidenti i Republikës vendosi sot një kurorë me lule tek memoriali i 4 dëshmorëve të Demokracisë që ranë gjatë demonstratës antikomuniste por arriti ta ha turpin me bukë me akuza dhe kërcënime ndaj Edi Ramës, në qytetin ku më 1 Prill 2013 firmosi sjelljen në pushtet të këtij njeriu i cili vetëm falë Ilir Metës u bë Kryeministër.

“Sot në Shkodër, jo vetëm nderojmë kujtimin e tyre të paharruar, por angazhohemi për ta çuar deri në fund amanetin e tyre dhe të gjithë dëshmorëve të tjerë që ranë për demokracinë, për zgjedhje të lira dhe për fjalën e mendimin e lirë, sepse Shqipëria ende vuan mungesën e tyre,” tha Meta i cili amanetin e 4 dëshmorëve dy ditë më parë e ngatërroi amanetin me Sigurimit të Shtetit.

Sot Ilir Meta e tha qartë se nuk e di se cila është përgjegjësia e tij dhe nuk i ka takuar shtresës së nderuar të të persekutuarve politikë, sepse nuk ka qenë i tillë, por heshtja shkodrane dhe në përgjithësi ajo shqiptare ndaj përdhosjes së viktimave të komunizmit, është dëshmi pse sot komunizmi vazhdon dhe sundon në Shqipëri, dhe pse një xhelat i Sigurimit të Shtetit mund të dekorohet edhe si “Kalorës i Flamurit”.

Ndryshe, kjo përdhosja e viktimave të komunizmit nga Meta ndodhi përkundër reagimit nga Shoqata Antikomuniste e të Përndjekurve Politikë të Shqipërisë pas dekorimit të Mehdi Bushatit nga Presidenti i Republikës, Ilir Meta, me Titullin e lartë “Kalorës i Urdhrit të Flamurit”, ku i kujtojnë Presidentit se kemi të bëjmë me njërin prej xhelatëve më famëkeq të Sigurimit të Shtetit.