Dje ngjalli pasiguri, sot lebetitet Edi Rama: Betejat nuk bëhen me iluzione, aq më pak luftërat!

Njeriu i cili nuk prodhoi asgjë përveç se fonde dhe performancë në kohë krize si në kohën e tërmetit, pandemisë, përmbytjeve e deri në ditët e luftës në Ukrainë duke përfshirë dhe takimin e djeshëm me importuesit, eksportuesit dhe përfaqësuesit zinxhirit të furnizimit me mallrat e shportës ku u pa qartë se se Kryeministri Edi Rama ishte në panik, sot reagoi ashpër kur akuzua nga opozita se po ngjallë pasiguri tek qytetarët me paralajmërimet për krizën energjetike.

Mbi iluzione, tha Rama, ngrihen piramida, por nuk bëhen beteja dhe aq më pak luftëra, dhe duke e lënë sot të qetë Konicën u mor me Nolin dhe disa nga vargjet e tij “Anës lumenjve” duke shmangur thelbin: Gatitjen e miletit dhe lebetitjen e tiranit.

“Dy vendet që janë të përfshira sot në atë luftë, Rusia për shkak të vendimmarrjes për t’u përfshirë dhe Ukraina si viktimë i asaj vendimmarrje janë burimet më të rëndësishme për Europën dhe botën në furnizimin me shumë prej lëndëve bazë. Flasim për vajin, sot në Gjermani nuk shkon dot në supermarket dhe të blesh sa të duash vaj. Është problem furnizimi, është problem rezervash dhe kur Ukraina furnizon me vaj më shumë se 40% të konsumit të Europës si mund të diskutohet sot. Ajo që shtrohet sot është që mbjelljet për prodhimet e reja të vajit bëhen tani, bëhen në mars, nuk bëhen si gruri më vonë. Kështu që këto janë fakte që duhet t’i dimë për të kuptuar që kështu që siç ecim deri tani, nuk ka asnjë arsye për t’u ndjerë veç të tjerëve për asnjë gjë, as për mirë, as për keq.

Dhe atyre që më thonë se dëgjova një zë që më erdhi dhe ‘një zë më vjen nga lumi, më buçet më zgjon nga gjumi’, për futjen e pasigurisë, shpresa nuk ngrihet mbi iluzione. Betejat nuk bëhen mbi iluzione. Përballja me krizat nuk mund të ketë kurrë sukses mbi iluzione. Mbi iluzione ngrihen piramida, me iluzione bëhet Vehbiu guvernator i financave të Shqipërisë, por nuk bëhen beteja dhe aq më pak luftëra. Që të fitohen betejat dhe luftërat duhet në radhë të parë të dihet e vërteta, çfarë po ndodh dhe si mund t’ia dalim,” tha Edi Rama nga foltorja e Parlamentit duke përfunduar:

“Patjetër që në këtë situatë ku kemi të bëjmë me një luftë që as nuk e ka imagjinuar, as nuk e ka nxitur, as nuk e ka vendosur shumica qeverisëse këtu dhe as mund ta ndalojë qeveria e Shqipërisë është mirë që të biem dakord të gjithë së bashku për faktet dhe pastaj të diskutojmë ditë natë për si t’ia dalim, por ama faktet të mos i vëmë në diskutim. Nuk dua të hyj më thellë. Sot kemi një gjë shumë më të madhe për t’u marrë se sa të tjerat pastaj që secili i ka mbi vete sipas pozicionit që ka.”

Ndryshe, dje në takim me importuesit, eksportuesit dhe përfaqësuesit zinxhirit të furnizimit me mallrat e shportës gjërat janë çdo ditë e më keq. 

“Të gjitha vendet po gjenden në një situatë krejt të paparashikuar dhe të paparashikueshme të rritjes së vazhdueshme të çmimit të energjisë. Dhe frika nuk është rritja e kostos, por mundësia e mungesës së energjisë!”