Djegia e mandateve/ Aleatët miratojnë vendimin e PD

Aleatët e Partisë Demokratike janë shprehur pro vendimit dhe kanë votuar  unanimisht për të djegur mandatet e deputetëve në Parlament.

Pas takimi me kryetarin e PD, Lulzim Basha, kryetari i Partisë Republikane, Fatmir Mediu tha se zëri i deputetëve të opozitës do të jetë së bashku me qytetarët në shesh dhe jo më në parlament.

“Djegia e mandateve është vendim i gjithë deputetëve. Zëri që do të mungojë në Kuvendin e Shqipërisë do të jetë një zë që do të jetë me qytetarët shqiptar” tha Mediu.

“Opozita është në kushte e realizimit të misionit të saj. Misioni është i vështirë dhe i rëndë dhe kërkon mbështetje më shumë se kurrë të qytetarëve. Kërkohet mbështetje e gjithë atyre që janë të mashtruar dhe të poshtëruar nga Edi Rama dhe Rilindja,” tha Dule. ndersa Shei shtoi:

“Sa kohë të jetë Rama aty do na shihni bashkë. Po nuk qe ai aty edhe mund të shihni ndonjë gjë ndryshe!”

Ndersa kryetari i PD, Lulzim Basha, tha pas takimit e gjithë opozita ka marrë një vendim për t’iu bindur urdhrit të qytetarëve shqiptarë:

“Sot ka ndodhur një akt i paprecedentë në historinë 28 vjeçare të pluralizmit. E gjithë opozita ka marrë një vendim për t’iu bindur urdhrit të qytetarëve shqiptarë, që u derdhën me trajtën dhe formën e sovranit në protestën mbarëkombëtare të 16 shkurtit. Të tjerat janë budallallëqe për të devijuar të vërtetën. E vërteta është kjo: Edi Rama nuk është më kryeministri i shqiptarëve. Është kapur nga prokuroria shqiptare dhe demaskuar nga Zëri i Amerikës si hajduti i zgjedhjeve të 2017-s. Parlamenti nuk është legjitim dhe ky është shkaku për pasojat që mblodhën qytetarët në shesh. Këto pasoja janë reale. Është papunësia, është varfëria e ulur këmbëkryq nga qendra e Tiranës e deri në skajin më të largët, keq e më keq. Është kolapsi total i sistemit arsimor, përfshirë atë universitar, është gjendja e shëndetësisë shqiptare… Është pra ekonomia, kriza sociale, emigracioni, që po zbraz Shqipërinë dhe këto probleme kërkojnë zgjidhje. Edi Rama nuk mund t’i japë këto zgjidhje për arsyen e thjeshtë se ai dhe qeveria e tij janë produkt i bashkëpunimit me krimin dhe me oligarkët. Janë të kapur nga krimi dhe oligarkët dhe u shërbejnë vetëm krimit dhe oligarkëve. Asgjë tjetër nuk e shpjegon se pse, pasi është kapur duke vjedhur 30 milionë euro tek Unaza, me një kompani që nuk ekziston, nuk shkon askush në burg. Asgjë tjetër nuk e shpjegon sesi mund të zhvendoset Lumi i Lanës, pak më tutje, për të mbrojtur pronën e një trafikanti droge, me projekt 60 milionë euro, dhe askush nuk penalizohet. Ky është një shtet i kapur nga krimi. Ky nuk është shteti që shqiptarët duan, ky nuk është shteti që shqiptarët meritojnë. Dhe këtë shqiptarët e treguan me protestën më të madhe në Shqipërinë më të rrudhur demografikisht në 28 vite. Ndaj, ju ftoj të mbani vëmendjen, sepse keni edhe ju një përgjegjësi të madhe, tek ky moment kyç i historisë tonë, që është mbi të gjitha një moment bashkimi, vetëdijësimi dhe qëndrese. Do të ketë një të ardhme për shqiptarët dhe kjo e ardhme nuk i përket as krimit, as oligarkëve, as pupacëve të tyre në parlament e në qeveri. U përket shqiptarëve të ndershëm, u përket njerëzve punëtorë të këtij vendi dhe fëmijëve të tyre dhe ne jemi të vendosur t’i prijmë betejës për t’ua dhënë këtë të ardhme Shqipërisë dhe shqiptarëve.”

Nderkohe dhe LSI ka dalë me deklaratën se do të djegë mandatet parlamentare:

“Shfaqim shqetësim për shkatërrimin e elementit themelor të demokracisë, ndarjen e pushteteve. Në mediat ndërkombëtare u paraqit gjendja e vështirë në vend, vjedhja e votës dhe problemet në vend. Vjedhja e votës është burimi themelor i konfliktit, keqqeverisja dhe pandëshkueshmëria.
Mazhoranca nuk ka realizuar reformat e nevojshme për hapjen e negaociatave për në BE.
Sjellja e mazhorancës është e qëllimshme për të mos garantuar zgjedhje të lira e të ndershme.
Me shqetësim pwrcjellim gjendjen e vështirë ekonomike, rritjen e taksave, korrupsionin galopant, ikjen e të rinjve.
Mazhoranca refuzon dialog politik dhe ka shfaqur bullizëm.
Ajo po refuzon një qeveri tranzitore që do garantojë zgjedhje të lira e të ndershme dhe reforma zgjedhore që do sjellin hapjen e negociatave për në BE.
Djegia e mandatave është rruga e vetme për të rikthtyer shtetin e së drejtës dhe rikthimin e legjimitetit.
LSI vendos djegien e mandateve dhe mandaton kryetarin e kësaj lëvizjeje që të ndjekë procedurat statutore,” tha kryetarja e LSI, Monika Kryemadhi.