Djegia e mandateve/ Deklaratë, PS dhe Aleatët në rolin e Opozitës, Presidentit…

Pas situatës së krijuar me djegien e mandateve nga ana e Opozitës së Bashkuar, Partia Socialiste dhe Aleatët, pas një takimi kanë lëshuar një deklaratë të përbashkët ku akuzohet PD dhe LSI se për qëllime politike tenton destabilizimin e vendit dhe kaosin shoqëror, duke na kthyer shumë vjet mbrapa, në të kaluarën me ngjarje të rënda të viteve ‘97 e ’98, dhe pasi ka marrë rolin e Opozitë, PS merr edhe atë të Presidentit duke bërë thirrje që nuk i takojnë me Kushtetutën e Republikës së Shqipërisë, si subjekte politike që janë .

Në deklaratën e firmosur nga Sekretari i Përgjithshëm i PS, Taulant Balla dhe 23 partitë aleate të PS-së, thuhet ashtu si edhe në çdo arsyetim të kandidatëve për deputetë që ishin në listat e PD dhe LSI dhe dolën kundër linjës së tyre partiake për të krijuar “Opozitën e Edi Ramës”, se braktisja e Parlamenti synon të dëmtojë rëndë interesat tona kombëtare dhe strategjike:

“Braktisja nga një grup deputetësh të PD dhe LSI të Kuvendit, të tempullit të demokracisë institucionale, synon të dëmtojë rëndë interesat tona kombëtare dhe strategjike në favor të interesave të ngushta të karrierës personale dhe llogarive partiake,” theksohet në Deklaratë duke shtuar se retorika dhe përdorimi i dhunës prej PD dhe LSI për qëllime politike tenton destabilizimin e vendit dhe kaosin shoqëror, duke na kthyer shumë vjet mbrapa, në të kaluarën me ngjarje të rënda të viteve ‘97 e ’98.”

Duke marrë tashmë rolin e mazhorancës dhe opozitës, Partia Socialiste përmes kësaj deklarate merr edhe rolin e kryetarit të KQZ dhe Presidentit të Republikës duke bërë thirrje për respektimine afatit të regjistrimit në KQZ:
“I bëjmë thirrje partive politike të të gjithë spektrit pluralist në vend të respektojnë afatet e regjistrimit në KQZ sipas Kodit Zgjedhor!”

Deklaratë:
Partitë politike të mbledhura në një tryezë konsultimi, thirrur nga Partia Socialiste:
– duke analizuar situatën politike në vend,
– duke gjykuar braktisjen e Kuvendit të Shqipërisë nga një pjesë e deputetëve të PD dhe LSI,
– duke konsideruar reagimin dhe mbështetjen e komunitetit ndërkombëtar,
– duke inkurajuar pa rezerva hapjen e negociatave për anëtarësim të Shqipërisë në BE,
– duke mbështetur me të gjitha energjitë funksionalitetin e shtetit dhe normalitetin shoqëror,
– duke këmbëngulur për zbatimin e Reformës në Drejtësi, sundimin e ligjit dhe luftën kundër korrupsionit,
– duke theksuar rëndësinë politike të zgjedhjeve vendore të 30 Qershorit të këtij viti,

DEKLAROJMË SE :

1.Braktisja nga një grup deputetësh të PD dhe LSI të Kuvendit, të tempullit të demokracisë institucionale, synon të dëmtojë rëndë interesat tona kombëtare dhe strategjike në favor të interesave të ngushta të karrierës personale dhe llogarive partiake.
2.Retorika dhe përdorimi i dhunës prej PD dhe LSI për qëllime politike tenton destabilizimin e vendit dhe kaosin shoqëror, duke na kthyer shumë vjet mbrapa, në të kaluarën me ngjarje të rënda të viteve ‘97 e ’98.
3.Mbështesim ndryshimet e propozuara të Kodit Zgjedhor dhe thellimin e këtyre ndryshimeve për të garantuar depolitizim të plotë të të gjithë Administratës Zgjedhore, pjesëmarrjen e emigrantëve në proceset zgjedhore dhe përdorimin e teknologjisë për numërimin elektronik të votave në një projekt pilot qysh në zgjedhjet vendore të 30 Qershorit.
4.Angazhohemi për të ndërtuar një platformë të përbashkët për një koalicion funksional dhe fitues të zgjedhjeve për organet e qeverisjes vendore.
5.I bëjmë thirrje partive politike të të gjithë spektrit pluralist në vend të respektojnë afatet e regjistrimit në KQZ sipas Kodit Zgjedhor. Partia Socialiste
Partia Social Demokrate
Partia Demokracia Sociale
Aleanca Popullore
Partia Socialiste e Moderuar
Aleanca Demokratike
Partia e Gjelbër
Partia e Unitetit Kombëtar
Partia G99
Aleanca për Demokraci dhe Solidaritet
Partia Ardhmëria Shqiptare
Partia Për Mbrojtjen e të Drejtave të Emigrantëve
Partia Socialpunëtore e Shqipërisë
Partia e Reformve Demokratike Shqiptare
Partia e të Drejtave të Mohuara
Aleanca për Barazi e Drejtësi Europiane
Partia e Punës së Shqipërisë
Partia Komuniste e Shqipërisë – 8 Nëntori
Partia Demokratike për Integrim dhe Prosperitet
Partia Kristiandemokrate
Partia Lëvizja Punëtore Shqiptare
Minoriteti Etnik Grek për të Ardhmen
Partia e Çështjeve Shqiptare
Partia Demokracia e Re Europiane
Partia Lëvizja për Drejtësi e Shqiptarëve
Partia Fronti i Majtë