“Djegia e Parlamentit”/ Pas Metës, PD: S’kemi pasur kurrë një plan të tillë!
Pas deklaratës së Presidentit Ilir Meta, sot në Komisionin Hetimor parlamentar, se kishte anuluar datën e zgjedhjeve 30 Qershor sepse kishte informacione se do të digjej Kuvendi i Shqipërisë, ka reaguar Partia Demokratike përmes Sekretarit të Përgjithshëm të PD-së, Gazment Bardhi duke sqaruar se Opozita e Bashkuar nuk ka pasur kurrë një plan të tillë.
“Partia Demokratike dhe opozita e bashkuar nuk ka pasur kurrë asnjë plan për djegien e institucioneve, pavarësisht se ato nuk përfaqësojnë interesin publik, por interesin e një grupi oligarkësh dhe kriminelësh të lidhur me kryeministrin e vendit,” tha Gazment Bardhi duke i bërë thirrje mediave të hapin arkivat e javëve përpara 30 qershorit dhe do të gjejnë se opozita dhe kreu i saj, Lulzim Basha, ka denoncuar skenarët e dhunshëm të Edi Ramës, që ka patur për qëllim t’i përdorë më pas kundër PD dhe opozitës.
“Në këtë këndvështrim, duhet të lexohet edhe deklarata e Presidentit Ilir Meta, i cili u shpreh se “nuk mund të pranonte një Rajshtag në Shqipëri”. Të gjithë e dinë se me djegien e dyshimtë të Parlamentit gjerman, Hitleri çimentoi pushtetin nazist pas ardhjes në pushtet pak kohë para djegies së Rajshtagut.”
Ndërkoh për Komisionin hetimor për shkarkimin e Presidentit, Sekretari i Përgjithshëm i PD, Gazment Bardhi tha se është një mjet për të mbuluar skandalet e qeverisë ilegjitime të Edi Ramës.
“Partia Demokratike e konsideron komisionin hetimor për shkarkimin e Presidentit si një mjet për të mbuluar skandalet e qeverisë ilegjitime të Edi Ramës, ndërsa anëtarët e këtij komisioni, personazhe të dosjeve 184 dhe 339, si bashkëpunëtorë të krimit në vjedhjen e zgjedhjeve lokale dhe parlamentare.”
