DnV prezantoi të dhënat nga fushata: Ka rritje të gjuhës së urrejtjes
Rrjeti i organizatave joqeveritare “Demokracia në Veprim”, DnV, ka prezantuar sot të dhënat më të fundit nga monitorimi i fushatës zgjedhore në terren dhe në hapësirën online duke përfshirë përdorimin e gjuhës së urrejtjes dhe shkeljet procedurale nga subjektet politike.
Sipas përfaqësueseve të DnV-së, Violeta Haxholli dhe Rezarta Delibashzade Krasniqi, zhvillim shqetësues veçohet vendimi i Qeverisë së Serbisë për të ndarë para për serbët e Kosovës.
“Një nga zhvillimet kryesore të javës së dytë të fushatës për zgjedhjet parlamentare të 9 shkurtit, është vendimi i Qeverisë së Serbisë për të shpërndarë, nga data 1 shkurt, 20 mijë dinarë (rreth 170 euro) për rreth 5 mijë serbë të papunë dhe ‘në vështirësi ekonomike’ në Kosovë. Ky veprim përbën ndërhyrje të jashtme në procesin zgjedhor të Kosovës dhe paraqet një përpjekje të hapur për të influencuar vullnetin qytetar të komunitetit serb, duke përdorur ndihmën financiare si mjet për të ndikuar në përcaktimin politik të votuesve,” tha Haxholli ndërsa shtoi se subjektet politike kanë vijuar fushatën në një atmosferë relativisht të qetë gjatë javës së dytë. Megjithatë, sipas saj, është evidentuar një rritje shqetësuese e përdorimit të gjuhës së urrejtjes në tubimet elektorale.
“Po vazhdon përdorimi i gjuhës nxitëse e urryese. Rastet e tilla janë rritur në këto dy javë, ku kemi hasur në 62 aktivitete. Më së shumti raste të tilla ka në aktivitetet e Vetëvendosjes, pastaj renditen LDK, AAK e Nisma dhe PDK,” tha Violeta Haxholli duke veçuar LDK-në e cila prin me aktivitete në fushatë, pasuar nga PDK, Vetëvendosje dhe AAK. Sa i përket qyteteve prin Prizreni me aktivitete, pastaj vijnë Prishtina, Peja dhe Gjilani.
“Subjektet po i mbajnë lirshëm tubimet, por në 14 raste subjektet politike nuk i kanë paralajmëruar tubimet siç është paraparë me ligj. Rreth 80% e aktiviteteve janë mbajtur në salla sportive, e 20% në lokale private. Në 47% të aktiviteteve kanë marrë pjesë deri në 200 pjesëmarrës, ndërsa tubime të mëdha me mbi 500 persona kanë qenë 13% prej tyre.”
Gjithashtu, DnV ka vërejtur një përmirësim në respektimin e rregullave që ndalojnë përfshirjen e nxënësve në aktivitete elektorale. Pas pesë rasteve të evidentuara javën e parë, këtë javë nuk është raportuar asnjë rast i tillë.
Rezarta Delibashzade Krasniqi ka prezantuar gjetjet nga monitorimi i hapësirës online, duke theksuar një rritje të dukshme të komenteve të urrejtjes, veçanërisht në videot e shpërndara nga fushata zgjedhore.
“Nga ky proces kemi vërejtur rritje të komenteve të urrejtjes, veçanërisht në videot që shpërndahen nga fushata. Nga monitorimi i portaleve kemi identifikuar 300 mijë komente nga palët e treta. Kjo pasqyron gjuhën e urrejtjes, teksa më së shumti janë gratë që kandidojnë për deputete që janë përballur me gjuhë të tillë,” tha Delibashzade duke saktësuar dhe gratë që kanë qenë veçanërisht të ekspozuara ndaj gjuhës së urrejtjes: Besa Kabashi Rama, Jeta Statovci dhe Albulena Haxhiu.
