Dodik kërcënon me pavarësim të Republikës Srpska nga Bosnje Hercegovina
Presidenti i Republikës Srpska, Milorad Dodik, ka kërcënuar me pavarësinë e këtij entiteti nga Bosnje Hercegovina, nëse përfaqësuesi i lartë ndërkombëtar, Christian Schmidt, vë në fuqi ligjin për pronat.
“Menjëherë pas kësaj Asambleja Kombëtare do të mblidhet dhe do të shpall statusin e pavarësisë së Republikës Srpska,” tha sot Dodik në Banja Llukë pas një takimi me përfaqësuesit e Republikës Srpska, raporton RFE.
Integriteti territorial dhe sovraniteti i Bosnje Hercegovinës si një shtet i vetëm, me dy entitete dhe qarkun e Brçkos, garantohen me Marrëveshjen e Paqes së Daytonit. Kjo marrëveshje dhe Kushtetuta e Bosnje Hercegovinës nuk lejojnë që entitetet të shkëputen.
Më 2 mars, Gjykata Kushtetuese e Bosnje Hercegovinës pezulloi përkohësisht Ligjin për pronën e paluajtshme të përdorur nga autoritetet publike në RS, deri në pritje të një vendimi përfundimtar të Kushtetueses.
Gjatë konferencës për media, Dodik tha se janë pajtuar që në buxhetin për vitin e ardhshëm të përfshijnë edhe një pikë që do të siguronte të ardhura për punëtorët në institucionet e Bosnje e Hercegovinës me kompensim të pagave, nëse përfaqësuesit e RS-së tërhiqen nga institucionet shtetërore.
Milorad Dodik, anëtarja serbe e Presidencës boshnjake, Zhelka Cvijanoviq, kryeministri i RS, Radovan CIshkoviq, kryetari i Asamblesë Kombëtare të këtij entiteti, Nenad Stevandiç dhe ministri i Drejtësisë i Republikës Srpska, Milosh Bujeloviç, janë nën sanksione amerikane për shkak të minimit të Marrëveshjes së Daytonit.
Takimi në Banja Llukë u mbajt dy ditë pasi Gjykata e Bosnjes konfirmoi aktakuzën ndaj Dodikut dhe ushtruesit të detyrës së drejtorit të Gazetës Zyrtare të Republikës Srpska, Milosh Lukiç, të cilët akuzohen për veprën penale të dështimit të zbatimit të vendimeve të përfaqësuesit të lartë në shtet.
Aktakuza erdhi pasi Asambleja Kombëtare e Republikës Srpska kalo dy ligje të diskutueshme më 27 qershor, të cilat Dodik i nënshkroi dhe më pas ato u publikuan në Gazetën Zyrtare të Republikës Srpska.
Këto ligje thonë se vendimet e Zyrës së përfaqësuesit të lartë në Bosnje më nuk do të publikohen në Gazetën Zyrtare dhe nuk do të respektohen në këtë entitet. Po ashtu, vendimet e Gjykatës Kushtetuese të Bosnje Hercegovinës më nuk do të vlejnë në Republikën Srpska.
Përfaqësuesi i lartë në Bosnje, Christian Schmidt, më 1 korrik anuloi këto vendime.
Për shkak të vendimeve të Asamblesë së Republikës Srpska, raporton RFE, Schmidt po ashtu ka vendosur që të bëjë ndryshime në Kodin Penal të shtetit, në mënyrë që çdo veprim joligjor që shkel rendin kushtetues të konsiderohet vepër penale. Me ndryshimet në Kodin Penal, moszbatimi i vendimeve të përfaqësuesit të lartë është vepër penale, për të cilën mund të shqiptohet dënim deri në pesë vjet burgim.
