Dodik: Më parë shkoj në burg, se sa ta pranoj gjenocidin në Srebrenicë

E kundërshtoi sapo hyri në fuqi me vendim të Përfaqësuesit të lartë në Bosnje Hercegovinë, por sot anëtari serb i Presidencës së BeH, Milorad Dodik, e shkeli hapur Kodin Penal me deklaratën se në Srebrenicë nuk kishte gjenocid ndaj boshnjakëve në vitin 1995, duke shtuar se do të këmbëngulë në këtë fakt sikur kjo do të nënkuptonte se i duhet të shkoj në burg.

“Absolutisht, më parë do të shkoja në burg se sa të pranoja diçka që nuk ka ndodhur, e ky është gjoja gjenocidi në Srebrenicë. Ky rrëfim për gjoja gjenocidin u bë aktual në vitin 2002, shtatë vjet pas ngjarjes. Përnjëherë e gjitha rreth kësaj ngjarje u aktualizua dhe ‘tani gjithçka dihet’. E vërteta është një, e kjo është gjenocid nuk kishte,” tha Dodik për gazetën serbe “Srpski telegraf” duke mos u mjaftuar me shkelje e Kodit Penal por duke shtuar se bashkimi i Republikës Srpska me Serbinë në kufijtë aktual duhet të mbetet qëllimi afatgjatë i serbëve të Bosnjes ndonëse kjo për momentin nuk mund të realizohet.

Ndryshe, muajin e kaluar, Përfaqësuesi i lartë në BeH, Valentin Inzko, urdhëroi ndryshimet në Kodin Penal ku parashikohet sanksionimi i personave që publikisht mohojnë krimet e luftës që janë dëshmuar në proces gjyqësor, duke përfshirë këtu dhe gjenocidin në Srebrenicë.

Sipas këtyre ndryshimeve, zyrtarët ose personat përgjegjës që shkelin këto nene të Kodit Penal do të dënohen së paku 3 vjet burg ndërkohë Përfaqësuesi i ri në BeH, Christian Schmidt, që mori detyrën me 1 Gusht tha se është i gatshëm të zbatoj kompetencat që përfshijnë dhe shkarkimin e zyrtarëve të zgjedhur.