Dogana e Kosovës së shpejti nis zhdoganimin e mallrave në Durrës
Nga hapja e pikës kufitare në Durrës, qeveritë e dy vendeve, Kosovës dhe Shqipërisë, kanë mundësuar eliminimin e vonesave në dërgesat e mallrave që targetohen në portin e Durrësit dhe janë të adresuara për Kosovë. Tash pritet që shumë shpejt të nis edhe zhdoganimi i mallrave në këtë port.
Dogana e Kosovës para dy viteve zyrtarisht kishte hapur zyrën e saj në Portin e Durrësit, marrëveshje kjo në mes Kosovës dhe Shqipërisë, për të lehtësuar tregtinë, lëvizjen e shpejtë të mallrave dhe të pasagjerëve.
Mirëpo, zhdoganimi i mallrave në Portin e Durrësit ende nuk ka nisur. Por ky proces duket se do të filloj së shpejti.
“Ende nuk kemi filluar me zhdoganim për shkak se ka procedura të ndryshme për financiare të cilat bëhen në rastin e pagesave. Besojmë se shumë shpejt do të arrihet edhe kjo dhe të filloj dhe të kemi një procedurë komplete të zhdoganimit. Jo pse tani nuk është procedurë komplete, sepse e njëjta procedurë e transitit zhvillohet edhe në pikat kufitare si psh, në Han të Elezi. Këto janë çështje të cilat i përkasin institucioneve të larta, Dogana është në aspektin e zbatimit të tyre”, kanë thënë në Doganën e Kosovës.
Zyrtarë të Doganës së Kosovës kanë treguar se nga kjo pikë doganore shfrytëzohet mjaft nga bizneset e Kosovës dhe përfitimet e tyre janë të shumta për dërgesat që i bëjnë në drejtim të Kosovës.
“Tani kompanitë kosovare mund të sjellin mallrat e tyre në Durrës, ato trajtohen dhe marrin trajtim doganimi nga Dogana e Kosovës si transit dhe pastaj vazhdojnë direkt në terminalin e brendshëm doganor në Kosovë. Pra, hallka e doganës së Shqipërisë, kontrolli dhe transiti për mes doganës së Shqipërisë kjo është eliminuar dhe është zhvendosur direkt tek dogana e Kosovës. Kur një dërgesë, e cila është deklaruar në Durrës dhe është për Kosovë, neve automatikisht na vjen lajmërimi që ka dërgesa të cilat do të vijnë në Kosove”.
Në Doganën e Kosovës presin që shumë shpejt të nis edhe zhdoganimi i mallrave në bregdetin shqiptar, ndonëse sipas tij, kjo mbetet në vullnetin e dy qeverive, asaj të Shqipërisë dhe Kosovës.
Në Portin e Durrësit gjatë vitit 2019 ishte hapur pika doganore e Kosovës. Ky projekt kishte nisur në vitin 2016.
Në ceremoninë e hapjes së kësaj zyre kryeministri i Shqipërisë, Edi Rama, kishte thënë se ky është hapi i parë i bashkimit të plotë të doganave mes dy vendeve.
“Dogana e Kosovës këtu në Durrës është hapi i parë i rëndësishëm drejt bashkimit të plotë doganor mes Shqipërisë dhe Kosovës. Njohja reciproke e sistemeve doganore, e agjentëve doganorë, realizimi i qëllimit të administratës doganore edhe pse ka dy krahë, funksionon si një trup i përbashkët, ma ha mendja se përbën një lajm të rëndësishëm për të gjithë sipërmarrjen. Kjo shpejton lëvizjen e mallrave dhe e kthen kufirin në një kufi formal mes Shqipërisë dhe Kosovës. S’do ketë radhë të gjata më në pikat doganore. Pas bashkimit doganor do kemi edhe bashkimin e tregjeve”.
Sipas statistikave të shkëmbimeve tregtare volumi i importeve të mallrave me origjinë Kosovën për vitin 2018 ka qenë 194 mijë/Ton ose 6 % më shumë se një vit më parë. Ndërsa volumi i mallrave të eksportuara drejt Kosovës gjatë vitit 2018 ka qenë në masën 1,026,270 Ton me një vlerë prej 27,031 mln lekë ose 211 mln Euro./Monitor/
