DOHA, Vjosa Osmani: Rruga jonë për liri ka qenë e përgjakshme
Suksesi ynë ka ardhur pas saskrificës së madhe, tha Presidentja e Kosovës, Vjosa Osmani, në edicionin e 20-të të Forumit të DOHA-s ku foli për rrugëtimin e Kosovës drejt lirisë, duke përmendur sakrificat e popullit të Kosovës, por edhe ndihmën e vendeve mike.
“Rrugëtimi ynë nuk ka qenë i lehtë dhe suksesi ynë ka ardhur pas saskrificës së madhe,” tha Presidentja Vjosa Osmani duke shtuar se Serbia, nën regjimin e njeriut të njohur si “Kasapi i Ballkanit”, ka kryer krime të përgjakshme.
Në fjalën e saj në Forumin e DOHA-s, Presidentja e Kosovës, Vjosa Osmani, shprehu gatishmërinë për rritjen e bashkëpunimit në sferën diplomatike, ekonommike, tregtare e kulturore.
Osmani: Kosova e përkushtuar të thellojë raportet me Katarin
Presidentja e Kosovës, Vjosa Osmani Sadriu, në takim me Emirin e Shtetit të Katarit, Sheikh Tamim bin Hamad Al Thani e falënderoi për marrëdhëniet e shkëlqyera në mes të dy vendeve dhe shprehu gatishmërinë për të thelluar bashkëpunimin diplomatik, ekonomik dhe tregtar.
Në takimin i cili u zhvillua në kuadër të vizitës zyrtare në Doha, Presidentja e informoi Emirin për progresin e gjithmbarshëm në Kosovë, duke përfshirë sektorët e bujqësisë, turizmit dhe infrastrukturës si fusha potenciale për investim nga Shteti i Katarit.
“Populli i Kosovës nuk do ta harrojë asnjëherë zemërgjerësinë e Shtetit të Katarit në momente të vështira e deri më sot. Ne mbesim të përkushtuar që të thellojmë raportet ndërshtetërore,” tha Presidentja Osmani duke folur për ndihmën e popullit dhe Shtetit të Katarit ndaj Kosovës përgjatë ditëve më të errëta për popullin tonë si dhe pas shpalljes së pavarësisë.
Ndryshe, Presidentja e Kosovës, Vjosa Osmani, po merr pjesë në edicionin e njëzetë të Forumit të Dohas i cili mbledhë liderë botëror, politikbërës, studiues dhe përfaqësues të shoqërisë civile për të diskutuar hapat përpara pas zhvillimeve të shkaktuara nga pandemia në të gjitha aspektet e jetës dhe zhvillimeve të fundit gjeopolitike, përfshirë luftën në Ukrainë.
