Dokumenti/ Zyrtarisht zmbrapset Meta, më 2 Mars as nuk e shpërndanë parlamentin, as…

Më në fund, të paktën zyrtarisht, një lajm i mirë vjen nga Presidenca: Presidenti i Republikës ka filluar ta lexoj Kushtetutën dhe ti kthehet ligjshmërisë! Kjo konstatohet pas Zyrtarizimit të Njoftimit drejtuar policisë për organizimin e manifestimit nga Presidenti i Republikës, më datë 2 mars 2020, ora 17:00, ku qartëson të gjithë ata që iu bindën shfaqjeve mediatike të Ilir Metës mbi shpërndarjen e parlamentit dhe ditës së fundit të Edi Ramës.

Pra, Ilir Meta pasi nuk e ka gjetur në Kushtetutë se figuron që është ai që shpërndanë parlamentin, ka vendosur thjeshtë të organizojë një protestë siç din të bëjë LSI dhe Mona, do të shoqërohet me mimoza dhe një dekret që Ilir Meta e quan “dekretit të parë kundër grushtit të shtetit”.

“Një prej qëllimeve të këtij manifestimi është nënshkrimi nga Presidenti i Republikës përpara sovranit (popullit), të dekretit të parë kundër grushtit të shtetit që kërkon të realizojë Kuvendi një partiak në dhunim të Kushtetutës me qëllim kapjen në mënyrë antikushtetuese të institucionit më të rëndësishëm të Republikës, Gjykatës Kushtetuese.”

Gjithsesi, përkundër këtij versioni Zyrtar të Ilir Metës, mbetet për tu parë ai real më 2 Mars duke pasur parasysh natyrën e paparashikuar të Metës nga tradhtia që i bëri Pandeli Majkos për rrëzimin e Nanos dhe u bë vet Kryeministër, KPD-ja socialiste, krijimi i Dushkut në zgjedhjet e vitit 2001, inicitaivës për ndarjen e Kosovës me Gjingjiçin, braktisjes së Berishës në vitin 2013, zgjedhjes së Edi Ramës kryeministër, kundërshtimin e ndarjes së Kosovës nga Rama, dekretimit të ligjeve të këtij parlamenti edhe pse e quan ilegjitim, dhe së fundi organizimit të një proteste, siç shihet nga njoftimi i Presidencës, edhe pse Kushtetuta e njeh mbi palët!

Njoftimi i Presidencës:

REPUBLIKA E SHQIPËRISË

INSTITUCIONI I PRESIDENTIT TË REPUBLIKËS

SEKRETARI I PËRGJITHSHËM

Nr._______ Prot.                                                     Tiranë, më ___.___.2020

Lënda:  Njoftim për organizimin e një manifestimi nga Presidenti i Republikës, në datë 2 mars 2020, ora 17:00.

ZOTIT ARDI VELIU

DREJTOR I PËRGJITHSHËM I POLICISË SË SHTETIT

DREJTORISË VENDORE TË POLICISË TIRANË

Të nderuar Drejtues,

Në mbështetje të nenit 47, 86 pika 1, 88 pika 3, 93, të Kushtetutës së Republikës së Shqipërisë, si dhe referuar procedurave të ligjit nr. 8773, datë 23.04.2001 “Për tubimet”, ju informojmë zyrtarisht se, SH.T.Z. Ilir Meta, në ushtrim të përgjegjësive dhe kompetencave të Tij kushtetuese si President i Republikës, do të organizojë një manifestim paqësor me qytetarët shqiptarë ditën e hënë në datë 2 mars 2020, ora 17:00, në Bulevardin “Dëshmorët e Kombit” Tiranë.

Qëllimi i këtij manifestimi paqësor është ndërgjegjësimi dhe zgjimi i qytetarëve shqiptarë për të mbrojtur dhe rivendosur sovranitetin e tyre mbi të gjitha institucionet e Republikës, të drejta këto, të garantuara nga Kushtetuta e Republikës së Shqipërisë dhe parimeve themelore të njohura prej saj.

Një prej qëllimeve të këtij manifestimi është nënshkrimi nga Presidenti i Republikës përpara sovranit (popullit), të dekretit të parë kundër grushtit të shtetit që kërkon të realizojë Kuvendi një partiak në dhunim të Kushtetutës me qëllim kapjen në mënyrë antikushtetuese të institucionit më të rëndësishëm të Republikës, Gjykatës Kushtetuese.

I gjithë ky ndërgjegjësim do të realizohet përmes mesazheve paqësore publike që Presidenti i Republikës do të japë në këtë manifestim.

Motoja e këtij manifestimi me qytetarët do të jetë: “Për Republikën; Për Kushtetutën; Për Kombin; Për unitetin e popullit”.

Sa më sipër, në zbatim të nenit 5 të ligjit të sipërcituar, ju bëjmë me dije se:

–        Drejtues i këtij manifestimi paqësor është SH.T.Z. Ilir Meta, me adresë Institucioni i Presidentit të Republikës, Bulevardi “Dëshmorët e Kombit”, nr. 1, Tiranë.  Organizator dhe persona kryesor ndihmës të këtij manifestimi, do të jenë zoti 1. Zoti Bahri Shaqiri, Këshilltar i Presidentit, 2. Zoti Dedë Prenga, Këshilltar i Presidentit, 3. Zoti Shemsi Premçi, Këshilltar i Presidentit, me adresë Institucioni i Presidentit të Republikës, Bulevardi “Dëshmorët e Kombit”.

–        Aktiviteti do mbahet më datë 2 mars 2020, ora 17:00 në Bulevardin “Dëshmorët e Kombit” dhe është i hapur.

–        Numri i pjesëmarrësve është jashtë çdo parashikimi.

–        Numri i personave të tjerë ndihmës në këtë manifestim është në varësi të kontributit të secilit qytetar që do të shprehë dëshirën dhe angazhimin për të marrë pjesë.

–        Qytetarët janë ftuar të kenë me vete Flamuj Kombëtar dhe buqeta me lule mimoze të frekëta që paralajmërojnë ardhjen e pranverës Kuq e Zi për të gjithë shqiptarët e bashkuar kudo janë.

–        Në këtë organizim do të mbajë fjalën e tij Presidenti i Republikës, Sh.T.Z. Ilir Meta dhe personalitete të spikatura publike që dëshirojnë të përcjellin mesazhe, frymëzuar nga motoja e këtij manifestimi, por jo politikan, dhe as ushtarakë aktivë.

Punonjësit e Policisë së Shtetit, nuk janë të ftuar të marrin pjesë në këtë manifestim, ndërkohë që Presidenti i Republikës, kërkon nga ana juaj që të merrni masat respektive për garantimin  e rendit dhe sigurisë publike në datën dhe orarin e njoftuar.