Dorëheqja e kryeministrit francez rrit rendimentet e borxhit të eurozonës
Rendimentet e borxhit qeveritar të eurozonës janë rritur ndërsa investitorët kërkojnë një prim më të lartë rreziku kur blejnë borxhin francez pas dorëheqjes së papritur të kryeministrit francez, Sébastien Lecornu.
Lecornu dha dorëheqjen dje, vetëm disa orë pasi njoftoi kabinetin e tij, dhe Presidenti Emmanuel Macron e ngarkoi atë të zhvillonte një raund tjetër bisedimesh me partitë politike në mbrëmje për të gjetur një rrugëdalje nga kriza, raporton Agjencia e lajmeve Reuters.
Rendimentet e obligacioneve rriten
Në kushte të tilla, rendimenti i obligacioneve gjermane 10-vjeçare, pikë kjo referuese për borxhin e eurozonës, u rrit këtë mëngjes në 2.74 për qind, 2.6 pikë bazë më shumë, ose 0.026 pikë përqindjeje më shumë se mbyllja e djeshme.
Rendimenti i obligacioneve franceze 10-vjeçare u rrit gjithashtu me të njëjtën sasi, në 3.59 për qind.
Rendimentet më të larta sinjalizojnë se investitorët presin oferta më të mira për të blerë obligacione, që do të thotë kosto më të larta huamarrjeje.
Rritje e primit të rrezikut për obligacionet franceze
Diferenca midis obligacioneve franceze 10-vjeçare dhe rendimenteve gjermane referuese u rrit në 83 pikë bazë, ose 0.83 pikë përqindjeje. Ajo arriti shkurtimisht në 0.8796 pikë përqindjeje, niveli më i lartë që nga 13 janari.
Diferenca tregon se sa prim rreziku janë të gatshëm të paguajnë investitorët për të blerë obligacione franceze, raporton Reuters.
“Diferenca midis rendimenteve franceze dhe atyre gjermane referuese është zgjeruar pas lajmit për largimin e një kryeministri tjetër francez, por është ende nën kulmin e saj,” tha strategu i lartë i rendimenteve të obligacioneve në ING Bank, Benjamin Schroeder.
“Ne shohim shumë hapësirë që ajo të zgjerohet më tej pasi klima politike është e mbushur me pasiguri,” paralajmëroi Schroeder.
Trendet afatgjata të obligacioneve
Rendimenti i obligacioneve gjermane 30-vjeçare u rrit me 0.038 pikë përqindjeje në 3.33 për qind.
Rendimenti i obligacioneve franceze 30-vjeçare u rrit me 0.031 pikë përqindjeje në 4.43 për qind. Rendimenti i obligacioneve italiane me të njëjtën maturim pasoi rritjen e borxhit gjerman, duke arritur në 4.51 për qind.
