Dorëhiqet kryetarja e Gjykatës në Durrës, u bë për Spital Amerikan

Kryetarja e Gjykatës së Durrësit, Joana Qeleshi, ka paraqitur dorëheqjen pranë Këshillit të Lartë Gjyqësorë duke theksuar se i është ofruar pozicioni i Drejtores Juridike pranë Spitalit Amerikan, vendim i cili u miratua.

“Pavarësisht pasionit tim për profesionin e gjyqtarit, duke qenë se më është ofruar një mundësi profesionale me preferencën dhe ekspertizën time në fushën e Shoqërive Tregtare, kam vendosur të ndjek një stad të ri në karrierën time, duke iu përkushtuar sektorit privat.

Mundësia që më është ofruar në këtë sektor në pozicionin e Drejtores Juridike pranë Spitalit Amerikan, paraqitet si sfidë e re profesionale për mua,” thekson Joana Qeleshi e cila ende nuk ka kaluar vettingun dhe një vit më parë KLD e shpëtoi nga shakrkimi.

Ndryshe, një vit më parë KLD ka rrëzuar kërkesën e Ministrisë së Drejtësisë për të shkartuar nga detyra, Joana Qeleshi, për shkak të një vendimi të dhënë lidhur me pronësinë e 45 mijë m2 tokë në Gjirin e Lalëzit, e cila u bë shkak për dhunimin dhe largimin nga Shqipëria të biznesmenit libanez, Fadi Mitri. Ky i fundit, me anë të kompanisë “Omnix” kishte planifikuar të ndërtonte një kompleks gjigant turistik me vlerë 450 milionë dollarë.