Dorëzimi i bilanceve/ Vetëm 70% e bizneseve me aplikim të miratuar nga QKB
Një ditë pas kaosit të krijuar me dorëzimin online të pasqyrave financiare ku bizneset e kishin të pamundur t’i ngarkonin ato në sistemin e Qendrës Kombëtare të Biznesit, QKB sqaroi situatën aktuale. Drejtori Juridik në Qendrën Kombëtare të Biznesit, Flogers Broqi, bëri një përmbledhje të numrit të aplikimeve për pasqyrat financiare të bizneseve të vitit 2018, ato të refuzuara, ato të miratuara si dhe numrin e subjekteve që kanë hapur çështje në portalin e-albania.
“Në lidhje me të dhënat mbi aplikimet për pasqyrat financiare të vitit 2018 ju bej me dije se numri total i aplikimeve në regjistër është 19250. Nga këto numri i aplikimeve të miratuara është 17139, numri i aplikimeve ne proces shqyrtimi është 706, numri i aplikimeve të refuzuara është 1405, pritshmeria e aplikimeve është 24218, numri i subjekteve/aplikimeve të cilët kanë hapur një çështje në portalin e-albania deri në datë 31.07.2019 ora 00.00 por nuk kanë mbërritur për shqyrtim në QKB është 3049 aplikime nga të cilët 1410 janë krijuar në datë 31.07.2019” tha Broqi.
Ky ishte viti i parë, kur në bazë të ligjit të kontabilitetit, është shtuar numri i pasqyrave që duhet të deklarohen. Krahas dorëzimit online të pasqyrave financiare, që zgjaste mesatarisht disa minuta, tashmë është shtuar dhe plotësimi i një sërë dokumenteve të tjera, si raporti i ecurisë së aktivitetit të ekonomisë, informacion për aktivet, të ardhurat, numri mesatar i punonjësve, kodin e biznesit etj.
Bizneset u ankuan vazhdimisht se sistemi është shumë i ngadaltë dhe faqja donte kohë të merrte dokumentet edhe gjatë qershorit e korrikut, ndërsa në 31 korrik sistemi u bllokua pothuajse tërësisht.
Qendra Kombëtare e Biznesit njoftoi se për shkak të mbingarkesës nuk do të aplikohen gjoba për ata që kanë marrë një numër aplikimi.
“Lidhur me detyrimin ligjor për depozitimin e pasqyrave financiare për vitin 2018, ju njoftojmë se subjektet të cilët kanë aplikuar online nëpërmjet portalit e-albania deri në datën 31.07.2018, (ora 24:00) dhe rezulton se aplikimi i tyre ka marrë një numër aplikimi (CN…), por për shkak të mbingarkesës së madhe të aplikimeve në të njëjtën kohë është bërë e pamundur plotësimi dhe dërgimi në mënyrën e duhur të pasqyrave financiare, nuk do të aplikohet kundërvajtje administrative në bazë të nenit 74, pika 3 e ligjit nr. 9723, datë 03.05.2007, “Për regjistrimin e Biznesit”.
ndërkohë të gjithë këto subjekte që kanë aplikuar, por që nuk kanë finalizuar me sukses aplikimin për arsyen e lartpërmendur duhet të përfundojnë aplikimin e nisur edhe pas datës 31.07.2019, dhe të dërgojnë në mënyrë përfundimtare pranë Qendrës Kombëtare të Biznesit pasqyrat financiare të vitit 2018 deri në datën 30.09.2019”, thuhet në njoftim./Monitor/
