Dorëzon Bashkinë Lezhë/ Nesër, Frrokaj: Pjerin Ndreun nuk e pres, 30 Qershori farsë!

Gjatë kostituimit të Këshillit të ri Bashkiak dhe betimit të Kryetarit të Bashkisë Lezhë të dalë nga zgjedhjet e 30 Qershorit, që pritet të zhvillohen nesër, nuk do të ketë rezistencë. Këtë e ka bërë të ditur sot Kryetari i Bashkisë Lezhë, Fran Frrokaj, ndërsa ka sqaruar se nuk do ta prese në zyrë Pjerin Ndreun sepse 30 Qershori ishte një farsë.

 “Unë nuk do ta pres në zyrë për një arsye, sepse këto votime nuk ishin votime por një proces fals. Nuk më shkon në mënd të bëj protesta. Jam munduar të jem Kryetar i Bashkisë i të gjithë qytetarëve, të majtë e të djathtë. Përfituesit në mënyrë jokorrekte me ligjet janë të majtët, por gjithsecili të paktën një herë kanë qenë në zyrën time,” tha Fran Frrokaj duke arsyetuar këtë vendim:

“Nuk e kam ndërmend të baltos 16 vite të punës time si Kryetar Bashkie dhe të nxis turma të ekzaltuara pro apo kundra atij. Dua ti uroj mbarëvajtje institucionit të bashkisë,” tha Kryetari i Bashkisë Lezhë, Fran Frrokaj duke mos e fshehur ambicien për të rikandiduar sërish për kryebashkiak nëse do të ketë zgjedhje të parakohshme.

Si ish student i dhjetorit Fran Frrokaj tha se vendi po shkon drejt diktaturës ndërsa shton se ka besim tek lideri i opozites Lulzim Basha.