Dosa!
nga Agim Popoci
Politikanët, gazetarët, analistët dhe gjithë impiantin e përpunimit të opinionit publik që e solli në pushtet, sot kryeministri Edi Rama i quan Derra!
Kjo shkaktoi me nxitim një valë reagimi nga ata që e ndjejnë veten të tillë, opinioni publik u tmerrua me fjalorin që përdori Kryeministri edhe pse kishte dalë për ta shpallë Lali Erin si kandidat për Tiranën në Zgjedhjet vendore 2019, ndërkohë debati vazhdon për atë se kush janë Derrat, nga erdhën dhe kush i pjelli këta derra dhe nuk po i lënë të qetë qytetarët shqiptarë me pult në dorë, për 20 vjet me radhë!
“Hap TV shikon vetëm zi, tmerr, e merr kohën telenovela e Babale Alizoti dhe telefonata e Niçes nga Shijaku, pastaj, fap, vjen djegia e mandateve dhe një popull i tërë zvarrë me telekomandë në derrhane, sherrhane të paparë cdo ditë, miza bëhet buall, miu bëhet ari, dhe derrave u drejtohen fjalë zotëri; Si mendon zotëria juaj, çmendoni ju zoti Kadri për Niçen e Shijakut, si e konsideroni Babalen. A mendoni ju zoti Kadri se Ilir Meta do vrasë veten, ç’e ka shtyrë presidentin të mendojë vetëvrasjen? Dhe derrat e shtrirë atje bëjnë vëzhgime, shfaqin opinione, kurse Shqipërisë juaj që fatmirësisht nuk jeton as në ato kanale, portale dhe falë kadrinjve, e qimkadrinjve, nuk u intereson,” thotë sot duke u bezisur Edi Rama me ata që e bënë kryetar Bashkie të Tiranës për inat të tropojanit Besnik, kryetar të Partisë Socialiste për inat të tepelensit të papërgjegjshëm Nano dhe së fundi kryeministër të Shqipërisë për inat të malokut Sali!
Të nisim nga e para. A ishin këta Derra kur në kandidimin për kryetar bashkie me kundërshtar Besnik Mustafajn, gjithë kjo bandë mediatike u mundua ta bindë opinionin publik se sa i mirë është Edi Rama, sa qytetar që është, se morali i tij është shumë i thjeshtë dhe se ka katër shtylla që ia tha kundërshtarit në sy : “Mos vrit, mos vidh, mos gënje dhe mos shko me gruan e tjetrit!”
Gjatë fushatës zgjedhore, këta Derra morën dhe përtypën mbeturinat mediatike të Edi Ramës kur ai deshi të dalë lakuriq, kur ai deshi të publikohen historitë me gjykatat në procesin e divorcit, dhe kur ato u ndërprenë në momentin që audienca kishte arritur kulmin dhe priste se çfarë do të rrëfente ish-vjehrri i Edi Ramës!
Këta Derra e pasqyruan pastrimin e Parkut Rinia dhe Bregun e Lanës si mrekulli të Edi Ramës edhe pse Shqipëria që nuk jetonte para gazetave dhe kanaleve të këtyre Derrave, e dinte që ato po shemben nga Mit’hat Havari që ishte vartës i Ilir Metës dhe nuk kishte të bënte me Bashkinë e Tiranës.
Derrat e relativizuan çështjen e Teatrit me brekët e Manushit ndërkohë kishim të bëjmë me një akt kriminal ashtu si edhe dhurimin ose shitjen e Kinemave, Shtëpive të Rinisë etj. për të cilët sot i penduar është vetëm një njeri, Edi Rama!
Derrat shkruanin dhe mbështetnin idenë e lyerjes së pallateve ndërkohë Shqipëria që nuk jetonte as në gazeta dhe as në ato kanale që mbronin veprat heroike të Edi Ramës, e kishin të qartë se mbrapa këtyre pallateve gjendja ishte mizerabël dhe atyre po i futej një bojë nga ca studentë që bëjnë eksperimente; Fakt të cilin e pranoi pas 20 viteve edhe vetë Lamçe!
Derrat i futën hundët edhe në KPD-në e famshme dhe nxorën një hero, ai që përplaste tavolinën dhe i luante fenë mikrofonave nga foltorja,për të treguar se ku ishte katandisur PS. Porositësi i këtij spektakli e arriti qëllimin por një detaj i kishte shpëtuar me këtë rast Edi Ramës, Derrat po e ndihmonin sepse Ilir Meta i kishte nën hyqëm. Por Edi Rama si yll në ngritje dhe mjeshtër i komunikimit masiv, e kuptoi se kush Derr çfarë mbeturine do, që nga “dajaku” që kishte marrë nga “pushteti i Saliut” dhe deri tek KPD-ja e famshme, dhe këtë ia lehtësonte të qenurit në krye të Bashkisë.
Prania e tij në Komisionin Hetimor me altoparlant si idiot, u pasqyrua në media si një akti i paparë që i kishte luajt Zotin Sali Berishës, dhe jo si një kundërshtim ndaj shtetit për hetimin e ishullit financiar e të paprekshëm, që zili do ti kishte sot cilado parajsë fiskale, për të cilat po thuren histori. Por Edi Rama me ndihmën e Derrave e kaloi edhe këtë mundësi kontrolli financiar që kurrë nuk u zbardhë.
Mbrojtja e pronës së Pezës me policë bashkiak ishte një krim i llojit të vetë që vetë Edi Rama mund ta bënte dhe e bënë, por Derrat flisnin për policinë e paaftë të Sali Berishës.
Ndërkohë rreziku Ilir Meta që po i kanosej Fatos Nanos nuk u mor seriozisht nga ky i fundit, madje Derrat që kishte Likja nëpër këmbë, për Nanon ishin thjeshtë shërbëtor të një provinciali, i cili vërtetë ishte dhe ngeli i tillë, por Fatos Nanos i iku partia nga duart. Ky ishte edhe momenti i reflektimit të atyre Derrave që po gëlltitnin gjithçka që u vinte para piktori, basketbollisti, ministri, kryeabashkiaku por jo edhe kryetari i PS. Prania e Majftit të Erion Veliajt ishte një llambë që u ndezë në subkoshiencën e atyre që i kishin shërbyer, se Edi Rama nuk është thjeshtë vetëm komunisti i familjes së tyre, por do edhe ca lekë rrugës. E meqë lekët ishin qëllimi i përbashkët por mënyra e ndarjes së kulaçit ishte paksa më e komplikuar, ai i cili i pjelli këta Derra, nuk u përplas për parime dhe ideologji, por pikërisht për këtë kulaç.
Sot duhet ta pranojmë se sa i përket Edi Ramës si person, ai, kurrë, as atëherë, nuk do të vinte në pushtet. Por, këta që sot i quan Derra, të shtrirë ose ulur ama me ndihmën e Ilir Metës, e bënë kryeministër Dosën e tyre që tashmë është e majme dhe nuk ka nevojë për të qëndruar në këmbë me Derra. Por, Dosa ka ngatërruar ca gjëra!
Edi Rama vërtetë i ka ndarë nga gjiri, nuk u jep më as qumësht, por procesi i ndarjes së Derrave nga gjiri është proces biologjik, dhe jo qejfi i Dosës.
Edi Rama edhe pa folur për Derrat të gjithë e kuptojnë se ata nuk e duan më Dosën e tyre, por duke sharë Derrat e tij ai nuk është më i besueshëm tek ata të cilët nga viti 1998 po shohin se si Dosa po shkatërron Tiranën, Durrësin dhe githë Shqipërinë…
