Dosja “5D”, GJKKO shpall vendimin, të dënuar nuk ka, mungojnë vetëm Mirënjohjet për të akuzuarit!
Drejtësia në shtetin e Edi Ramës funksionon deri sa nuk e hap gojën, po foli, turpi dhe faqja e zezë nuk kanë se si të kenë emër ndryshe! Kështu ndodhi edhe me grupin e dytë të hajdutëve të Bashkisë Tiranë nga “Dosja 5D”, për të cilët kishte idealist që mendonin se për shkelje kaq të rënda edhe mund të dënohen të pandehurit Deborah Keçi, Teuta Guri, Renaldo Gjerasi dhe Jetjon Mera, por, tashmë Gjykata e Posaçme, GJKKO, shpalli vendimin dhe ata janë të lirë.
Deborah Keçi, u dënua për shkelje të barazisë në tendera me 1 vit burg, për shkak të gjykimit të shkurtuar u konvertua në 8 muaj burg. Në fund, dënimi u konvertuar në 60 orë punë në interes publik dhe ngeli vetëm një kërkimfalje pa u dhënë dhe Mirënjohja pse abuzoi me tenderat, pasi Reforma në Drejtësi me të cilën mburret Kryeministri i Pekishtit, Vorës dhe gjithë Shqipërisë, Edi Rama, nuk e parashikon.
Fat të ngjashëm kishin edhe tre homolgët e saj, shkelës të ligjit: Teuta Guri Renaldo Gjerasi dhe Jetjon Mera, janë dënuar fillimisht me 9 muaj burg, që konvertohet për shkak të gjykimit të shkurtuar me 6 muaj burg. Në fund, dënim u konvertua në 60 orë punë në interes publik për secilin prej tyre.
Për ata që kanë pak kuriozitet të dinë se pse u akuzuan nga SPAK ky grup i hajdutëve të Erion Velisë që sot u lanë të lirë në shtetin ku nuk ka më të paprekshëm por vetëm të padënuar:
“Nga veprimet hetimore është provuar fakti se shoqëria tregtare “5D Konstruksion” sh.p.k e cila është zotëruar në mënyrë indirekte nga shtetasit Redi Molla dhe Mariglen Qato, ish funksionarë të Bashkisë së Tiranës, ka përfituar kontrata publike në kundërshtim me rregullat e prokurimit publik nga autoritetet kontraktore “Tirana Parking” dhe “Klubi Sportiv Tirana”,” thekson SPAK duke saktësuar se e pandehura Deborah Keçi, zyrtare e lartë në Bashklinë e Tiranës në bashkëpnim me vartësit e saj, Teuta Guri, Jetjon Mera dhe Rejnaldo Gjerazi, në cilësinë e anëtarëve të Komisionit të Vlerësimit të Ofertave kanë favorizuar kompaninë 5 D duke e shpallyur fituese të tenderit për “Rikonstruksionin e Palestrës së Mundjes”, tender I zhvilluar në 2020.
“Deborah Keçi, është dakortësuar me përfaqësuesin e operatorit ekonomik “V.A.S Konstruksion” sh.p.k për ta shpallur fitues të procedurës së prokurimit që në fazën e përgatitjes së dokumenteve, ende pa u shpallur procedura.”
Hetimet e SPAK kanë zbuluar gjithashtu se Eglantina Zere, drejtoreshë e “Tirana Parking” institucion në varësi të Bashkisë Tiranë, në bashkëpunim me të pandehurit Enkelejda Qyta, Bruno Koçi dhe Rivjola Baxha, në cilësinë e anëtarëve të Komisionit të Vlerësimit të Ofertave, si dhe me të pandehurin Kristo Zhulati në cilësinë e anëtarit të Njësisë së Prokurimit kanë krijuar avantazhe dhe privilegje të padrejta për bashkimin e operatorëve ekonomik fitues “V.A.S Konstruksion sh.p.k” dhe “Rroku Guest” sh.p.k, në procedurën e prokurimit me objekt “Rikonstruksion i sheshit të parkimit te Selman Stermasi”, të zhvilluar në datën 01.10.2019.
“Provat e mbledhura gjatë hetimeve provojnë plotësisht faktin se verifikimin dhe vlerësimin e ofertave të operatorëve ekonomikë që kanë marrë pjesë në këtë procedurë prokurimi nuk e kanë bërë anëtarët e KVO-së, por e kanë bërë persona të tjerë që kanë punuar në shoqërinë “5D Konstruksion” sh.p.k:, theksohet në dosje.
Më herët SPAK dorëzoi për gjykim pjesën e parë të dosjes 5D ku të pandehur janë Redi Molla, Mariglen Qato e Taulant Tusha si dhe disa ish-zyrtarë të tjerë të dyshuar për korrupsion e pastrim parash.
