Dosja “Babale”, gjykata liron nga burgu Fredi Alizotin

Njëri ndër protagonistët kryesor të dojes gjyqësore të njohur si “Babalja”, Fredi Alizoti, ka dale nga qelia. Alizoti është liruar nga Gjykata e Tiranës, pasi bashkë me paraburgimin, e ka kryer tashmë dënimin prej 2 vitesh burg sa është dënuar.

Ndryshe, në dhjetor të vitit 2019, Gjykata e Tiranes e shpalli fajtor Fredi Alizotin duke e dënuar me 2 vite burg. Fajtor u shpall edhe Ish-Deputeti i PD, Ervin Salianji i cilu dënua me 1 vit burg, si dhe gazetari Jetmir Olldashi i cili u dënua me 6 muaj burgim dhe pezullimin e dënimit me shërbim prove, duke kryer 100 orë pune në shërbim publik.

Ndërsa protagonistin kryesor të çështjes, Albert Veliun i njohur me nofkën “Babale”, Gjykata e Tiranës e shpalli fajtor dhe e dënoi me 3.5 vite burg.

Çështja “Babale” mori dhenë pas publikimit të audiopergjimeve, kur opozita akuzoi Ish-Ministrin e Brendshëm, Fatmir Xhafaj, se kishte mbrojtur vëllanë e tij, Agron Xhafaj, (emri i të cilit dilte në audiopërgjime) i dënuar me 7 vjet e 4 muaj burg në Itali. Agron Xhafaj nuk u arrestua por u dorëzua tek autoritetet italiane dhe vazhdon të jetë në qeli, ndërsa Prokuroria nisi paralelisht një hetim.

Por opozita nuk ndaloi me kaq, ajo vazhdoj me denoncimet duke publikuar përgjime të tjera ndërsa hetimet e prokurorisë i quajti farsë ashtu si ekstradimin misterioz të Agron Xhafajt, me qëllim të mbrojtjes së trafikantve të drogës dhe për të kërcënuar denoncuesit.