Dosja në SPAK, Gjykata e Vlorës: Fredi Beleri, arrest me burg

Gjykata e Vlorës ka caktuar masën “arrest me burg” për kandidatin e koalicionit ‘Bashkë Fitojmë’ për Kryetar të Bashkisë Himarë, Fredi Beleri.

Mësohet se pas disa orësh seancë, ku prokurori i çështjes ka paraqitur ato që i cilëson prova që vërtetojnë sipas tij akuzën e blerjes së votave, togat e zeza vendosën që të linin në burg Belerin. Ndërkohë, dosja e tij do t’i kalojë për gjykim Prokurorisë së Posaçme Antikorrupsion, SPAK-ut.

Avokati: Arrestimi për motive politike

Pasi Gjykata e Vlorës caktoi masën “arrest me burg” për kandidatin e koalicionit ‘Bashkë Fitojmë’ për kryetar të Bashkisë Himarë, Fredi Beleri, avokati i tij, Geni Gjyzari, tha se arresti ishte për motive politike dhe se u konsiderua i ligjshëm.

“Caktuan SPAK-un për kompetencë. Brenda 10 ditëve do të bëhet vlefshmëria e një akuze të re ndoshta. Nuk u faktuan akuzat. Ne nuk ishim në kushtet e flagrancës. Ishin komplet veprime të simuluara nga policia që ka përdorur një individ,” tha Gjyzari.

Ndryshe, Fredi Beleri orët e para të së premtes, para lokalit të tij bashkë me një person tjetër nën akuzën për blerje votash për zgjedhjet që pritet të mbahen nesër. Forca të shumta policie morën pjesë në prangosjen e tij, që u bë me urdhër të SPAK. Vetë Beleri dhe të tjerët, kanë mohuar që të jenë përfshirë në shkelje të tilla, si blerja e votave. Sipas policisë, hetimet nisën 4 ditë më parë pas informacioneve se disa persona iu ofronin qytetarëve të ndryshëm, shuma të caktuara parash kundrejt dhënies së votës për një nga kandidatët konkurrues.