Doza e tretë, OBSH: Rivaksinimi duhet të shtyhet!

Drejtori i Përgjithshëm i Organizatës Botërore të Shëndetësisë, OBSH, Tedros Adhanom Ghebreyesus, tha sot se rivaksinimi kundër COVID-19 duhet të shtyhet dhe prioritet duhet të jetë rritja e numrit të të vaksinuarve në shtetet ku vaksina kanë marrë 1-2 për qind e popullsisë.

“Nëse përqindja e të vaksinuarve në botë nuk rritet, mund të paraqiten variante të reja të virusit, kështu që dozat e planifikuara për rivaksinim të atyre që kanë marrë dy doza duhet ti jepen shteteve ku popullsia nuk e ka marrë asnjë ose vetëm një dozë,” tha kreu i OBSH gjatë vizitës në Budapest.

“Dhe, debati nëse doza e tretë është efikase, ende vazhdon,” tha Ghebreyesus pas takimit me ministrin hungarez të punëve të jashtme, Peter Szijjart, duke shtuar se dozën e tretë duhet ta marrin vetëm ata që kanë imunitet të dobët dhe kjo është një pjesë e vogël e popullsisë. 

Javën e kaluar, OBSH ka bërë të ditur se të dhënat aktuale nuk dëshmojnë se është i nevojshëm rivaksinimi dhe se duhet të vaksinohen grupimet më të dobëta në gjithë botën para se shtetet e pasura të fillojnë të japin dozën e tretë. 

SHBA ka paralajmëruar javën e kaluar se po planifikon që të mundësohet doza e tretë në gjithë vendin deri më 20 shtator, në kohën kur numri i të prekurve me variantin Delta është në rritje.

Dozën e tretë ka filluar ta jep edhe Hungaria për të gjithë ata që kanë marrë dozën e dytë para të paktën katër muajve ndërsa rivaksinimin për të gjithë mbi moshën 40 vjeç e ofron Izraeli.