DPA: Konferenca e IV Mbarëkombëtare e Arkivistikës, 5-7 Qershor në Sarandë

Drejtoria e Përgjithshme e Arkivave, DPA, shpalli sot në Tiranë mbajtjen e Konferencën e katërt Mbarëkombëtare e Arkivistikës që do të zhvillohet në Sarandë prej 5 deri në 7 Qershor 2020.

“Pas Konferencave të zhvilluara në Tiranë, Prishtinë dhe Shkup , arkivistët nga të gjitha trevat do të mblidhen këtë herë në Sarandë fal mbështetjes bujare të Bashkisë Sarandë që mundësoi vendin, qëndrimin dhe bashkëorganizimin e konferencës,” thekson DPA duke folur për një aktivitet shumë të rendësishëm në fushën e Arkivave.

“Qëllimi i kësaj konference është të mbledhë ekspertët dhe studiuesit e Arkivës të dy vendeve të cilët diskutojnë çdo vit, për problematikat, metodologjinë e studimit, dixhitalizimin dhe përmirësimin e infrastrukturës së përmbajtjes, inovacionin, si dhe vizionit të punës së Arkivave në realitet e sotme,” tha Drejtorja e Evidencës Qendrore dhe Komunikimit pranë DPA, Elsa Saka, duke ftuar me këtë rast studiuesit, nëpunësit dhe të gjithë të interesuarit e kësaj fushe, të marrin pjesë në Konferencë me studime, ide dhe propozimet e tyre.

Temat që propozohen për diskutim lidhen specifikisht me arkivistikën, të drejtat e njeriut dhe me historinë e arkivave apo institucioneve arkivore në zonat shqipfolëse, saktëson Drejtoria e Përgjithshme e Arkivave duke shtuar se përveç arkivistëve të rrjeteve arkivore kombëtare, ftesa për pjesëmarrje u drejtohet të gjithë profileve të tjerë të arkivistëve, institucioneve që ruajnë apo atyre që ndërveprojnë me ruajtjen e kujtesës kolektive.

Ndryshe, ky aktivitet organizohet nga Drejtoria e Përgjithshme e Arkivave në bashkëpunim me Agjencinë Shtetërore të Arkivave të Kosovës dhe Bashkisë Sarandë.

Abstraktet pranohen deri më datë 11 prill 2020 në gjuhët shqip dhe anglisht.