DPA, nis digjitalizimi i fondit arkivor të Komunitetit Katolik

Drejtori i Përgjithshëm i Arkivave, Ardit Bido dhe Ipeshkvi Gjergj Meta nënshkruan sot marrëveshje bashkëpunimi me qëllim të digjitalizimit të dokumenteve arkivore të Komunitetit Katolik në Shqipëri.

Kjo marrëveshje, tha Drejtori i Përgjithshëm i Arkivave, konsiston në digjitalizimin e të gjithë dokumentacionit të Komunitetit Katolik në Shqipëri dhe të çdo materiali tjetër që është krijuar për Komunitetin Katolik që ndodhet në Fondet Arkivore.

“Në radhë të parë është korigjimi i një padrejtësie historike përmes një vije të përbashkët ku i gjithë dokumentacioni i cili është sekuestruar komuniteteve fetare iu rikthehet atyre tashmë në formë digjitale ndërkohë që kopja origjinale ruhet në Arkivin Qendror Shtetëror, ku ekzistojnë kushtet e nevojshme të ruajtes së saj,” tha Ardit Bido ndërsa Ipeshkvi Gjergj Meta duke vlerësuar këtë moment tha se falë Drejtorisë së Përgjithshme të Arkivave shumë dokumente janë ruajtur.

“Kjo është një padrejtësi që i është bërë arkivave të Kishave Katolike, duke u konfiskuar, tani po riparohet në një farë mënyre, nëpërmjet kësaj rruge të ndërmjetme, që është digjitalizimi. Duhet thënë një fakt, sikurse thotë një shprehje, ‘Jo çdo e keqe vjen për të keq’, në fakt falë Arkivit Qendror Shetëror shumë dokumente janë ruajtur,” tha Ipeshkvi Gjergj Meta.

Në fund, Drejtori i Përgjithshëm, Ardit Bido sqaroi se Drejtoria e Përgjithshme e Arkivave do të sigurojë teknologjinë dhe pajisjet e nevojshme për zhvillimin e procesit të digjitalizimit dhe të depozitimit të dokumenteve, ndërsa Komuniteti Katolik do të vërë në dispozicion të Drejtorisë së Përgjithshme të Arkivave persona nga stafi i tij me qëllim skanimin e dokumenteve.

Në saje të kësaj marrëveshje, dokumentet do të skanohen sipas parimeve tekniko-profesionale arkivore, në nivel Fondi, Viti, Dosje dhe Fletë.