DPA, nxitje për studimet e Albanologjisë

Drejtoria e Përgjithshme e Arkivave, DPA, dhe Instituti i Historisë nënshkruan sot një Marrëveshje e cila mundëson nxitjen e studimeve në fushën e Albanologjisë.

Me këtë Marrëveshje, Drejtoria e Përgjithshme e Arkivave merr përsipër të furnizojë me kopje dokumentesh falas Institutin e Historisë, ndërsa Instituti do të mundësojë  hartimin dhe botimin e përmbledhjeve të dokumenteve arkivore. Drejtori i Përgjithshëm i Arkivave, Ardit Bido theksoi se ky bashkëpunim është një përfitim institucional, duke plotësuar njëri-tjetrin në burime njerëzore dhe në burime arkivore.

“Kjo marrëveshje realizon një interes kombëtar përsa i përket studimeve albanologjike dhe studimeve  në fushën e përmbledhjeve të dokumenteve, duke nxitur më tej studimin e historisë sonë kombëtare,”  
tha Bido ndërsa Drejtori i Institutit të Historisë, Akademik Beqir Meta u shpreh i kënaqur nga ky bashkëpunim, duke falënderuar Drejtorinë e Përgjithshme të Arkivave.

Ndryshe, kjo është Marrëveshja e parë e bashkëpunimit mes Drejtorisë së Përgjithshme të Arkivave dhe Institutit të Historisë.