Dr.Alimehmeti tërhiqet, Këlliçi: Më 14 maj, bashkë kundër Erion Veliajt!
Kandidati për primare i Partisë Demokratike për Bashkinë Tiranë, Ilir Alimehmeti, në respekt të votës së anëtarësisë ndërsa falënderoj çdo votues e numërues që mori pjesë në këtë proces, u tërhoq sot nga balotazhi duke e njohur si fitues rivalin, Belind Këlliçi.
Ky gjest, tashmë për kandidatin zyrtar të Partisë Demokratike për Bashkinë Tiranë në zgjedhjet e 14 Majit 2023, Belind Këlliçi, e fisnikëroi dhe më shumë garën më 14 maj ku ai e sheh Dr.Alimehmetin si krahun e tij të djathtë.
“Jemi këtu më pak se 24 orë nga Primaret ku anëtarësia shprehu vullnetin me votë për herë të parë. Respekt votës së anëtarësisë, falënderoj çdo votues e numërues për një proces që shkoi nga fillimi në fund me transparencë brenda një kohe të shkurtër. Nga fillimi i këtij procesi isha i bindur se anëtarësia duhet të shprehej,” u shpreh Dr. Ilir Alimehmeti i cili në Primaret e 4 dhjetorit u rendit i dyti me 2196 vota ndërsa përfundoi: Respekt votës së anëtarësisë, falënderoj çdo votues e numërues për një proces
Kam qenë i bindur se ishte anëtarësia që duhet të kishte rol kryesor. Anëtarësia foli në favor të kandidatit pranë meje, Belind Këlliçit, djalë i shkëlqyer, nga ana politike e njihni mjaft mirë. Sido të shkonte do isha në krah të kandidatit apo kandidates, në këtë rast kandidatit që do gëzonte votën e anëtarësisë. Duhet njohur vota dhe duhet kuptuar siç duhet.”
Ndërsa Belind Këlliçi i cili ishte në këtë dalje publike me 4040 vota të fituara në Primaret e 4 Dhjetorit për Tiranën, tha se i vetmi lajm i keq sot është për Erion Veliaj që PD dhe opozita e bashkuar kanë këtë standard ndërkohë me Dr.Ilir Alimehmetin nga ky moment fillojnë fushatën së bashku përballë Veliajt, ku do të jetë krahu i tij i djathtë dhe në rast të fitores, Nënkryetar i Bashkisë Tiranë.
“Sot shqiptaret janë të befasuar nga ky standard i vendosur në politikën shqiptare. Fokusin kryesor e kam pasur te baza dhe anëtarësia e Partisë Demokratikë. Kjo ka qenë një fushatë civile e qytetare, jemi sërish me njëri-tjetrin.
Jam i bindur se ky është një ogur i mirë në politikën shqiptare. Jam krenar që kam qenë pjesë e këtij procesi dhe për ta çuar një standard më tutje ne sot publikisht do adaptojmë një formë amerikane të garës, formën presidenciale. Ashtu si në Amerikë kam kënaqësinë më të madhe sot që kur i kam hyrë këtij rrugëtimi kam qenë i bindur se do ta mundja Veliajn në garën për Tiranën, me Alimehmetin si krahun tim të djathtë dhe nënkryetar të bashkisë së Tiranës që nga 14 maji ne do sjellim një model krejtësisht ndryshe.
Falënderoj dr. Ilir Alimehmetin të cilin kam pasur fatin ta njoh para angazhimit tonë në politik. Është fisnik dhe fisnikëroi dhe më shumë garën. më 14 maj do të sjellim një model të të bërit politikë krejt ndryshëm. Falënderoj të gjithë demokratët, të cilët dolën ditën e djeshme dhe pse në kushte të vështira për të votuar,” tha Belind Këlliçi që sot kandidat i PD për zgjedhjet e 14 Majit duke përfunduar:
“I vetmi lajm i keq sot është lajmi për Erion Veliaj që PD dhe opozita e bashkuar kanë këtë standard. Jam ndier i privilegjuar dhe jam ndjerë krenar që kam qenë në një garë me dr. Ilir Alimehmetin. Nga ky moment fillojmë fushatën së bashku përballë Erion Veliajt.”, tha Këlliçi.
Ndryshe, pas primareve të PD për Bashkinë Tiranë për zgjedhjet e 14 majit 2023 që u zhvilluan më 4 dhjetor, Belind Këlliçi dhe Ilir Alimehmeti, si dy më të votuarit por pa i marrë 50%+1 votave, kaluan në balotazh i cili pritej të zhvillohej më 11 Dhjetor.
