Dr.Basri Sejdiu: Shkarkimi im, i padrejtë dhe politik!
Ish-Drejtori i Përgjithshëm i Shërbimit Spitalor dhe Klinik Universitar të Kosovës, SHSKUK, Dr.Basri Sejdiu, e cilësoi si të padrejtë dhe politik vendimin për shkarkimin e tij. Arsyetimet e Bordit drejtues të SHSKUK për shkarkimin e tij, sipas Dr.Sejdiut, nuk qëndrojnë.
“Është një e padrejtë e madhe që më është bërë, pasi puna ime shihet. Edhe me sistem kardiovaskular kemi bërë punë të madhe, edhe në Klinikën Neurologjike ku trajtohet sulmi në tru, kemi përmirësuar infrastrukturën. Kemi bërë zgjidhje gjatë kohës së pandemisë [së koronavirusit], kemi krijuar hapësira të reja,” tha Sejdiu për RFE por nuk dha detaje për arsyet e shkarkimit.
Me këtë rast ai kritikoi bordin e SHSKUK se e ka penguar punën e tij duke shtuar se gjatë pandemisë së koronavirusit, ky bord nuk është marrë me menaxhimin e situatës.
“Bordi i SHSKUK-së ka vendosur kështu, ndonëse nuk është marrë asnjëherë me pandeminë, përkundrazi e ka penguar punën time gjatë kësaj kohe. Unë mendoj se për qëllime politike po bëhen ndërrime në kohë të pazakontë. Kur jemi të mobilizuar 24 orë të shpëtojmë jetë njerëzish, merren këto vendime pa paralajmërime prej bordit, kur kontributi i tij është zero gjatë kësaj kohe të pandemisë. Mendoj se bordi duhet ta përkrahë menaxhmentin në këtë kohë, por ai ka vepruar në të kundërtën”, tha Dr.Basri Sejdiu duke saktësuar se shkarkimi i tij nuk ka të bëjë me vdekjet e disa pacientëve në QKUK, të cilat po hetohen nga Prokuroria Themelore në Prishtinë.
Mediat lokale në Kosovë raportuan të dielën se ka pasur probleme me sistemin e oksigjenit në repartet ku po trajtoheshin pacientët me sëmundjen COVID-19, që e shkakton koronavirusi.
Por, sipas Sejdiut, konstatimet paraprake kanë treguar se gjithçka ka qenë në rregull sa i përket oksigjenit dhe aparaturës.
“Inspektorati farmaceutik ka konstatuar se gjithçka është në rregull. Aparatura është në servisim, kështu që zero për qind ka të bëjë me këtë,” tha Dr.Sejdiu.
Ndryshe, Bordi drejtues i SHSKUK-së njoftoi dje se Sejdiu është shkarkuar nga posti i Drejtorit të Përgjithshëm të Shërbimit Spitalor dhe Klinik Universitar të Kosovës.
“Shkarkimi vjen si pasojë e performancës jo të kënaqshme dhe mospërmbushjes së detyrave të punës. Në vend të dr Sejdiut, ushtrues detyre i drejtorit është caktuar dr Valbon Krasniqi, mjek specialist i infektologjisë,” u tha në njoftimin e Bordit drejtues të SHSKUK-së, por, raporton RFE, nuk u dhanë detaje se për çfarë performance bëhet fjalë dhe cilat detyra nuk janë përmbushur.
