Draft rekomandimi/ Hapje negociatash me Shqipërinë, por mungon data…
Bashkimi Europian pritet të hapë negociatat e anëtarësimit me Shqipërinë, por pa një datë.
Vizion Plus ka siguruar draft-rekomandimin e Këshillit të BE-së, i cili tashmë është duke u shqyrtuar nga të gjithë vendet anëtare, përpara takimit të 28-29 qershorit. Në këtë dokument, propozohet nisja e bisedimeve, ndërsa nuk jepet koha për uljen në tryezë.
“Këshilli vendos për të hapur negociatat e pranimit me Shqipërinë. Me qëllim mbajtjen e Konferencës së parë Ndërqeveritare, Këshilli nënvizon nevojën kritike që Shqipëria të konsolidojë më tej progresin e bërë në reformën gjyqësore në veçanti përmes vettingut dhe të japë rezultate të tjera të prekshme në luftën kundër korrupsionit në të gjitha nivelet dhe në luftën kundër krimit të organizuar, në veçanti për kultivimin dhe trafikimin e drogës.
Këshilli i bën thirrje Komisionit që të vëzhgojë nga afër përpjekjet e reformave së lartpërmendur nga Shqipëria dhe do të vlerësojë progresin në bazë të një raporti të Komisionit përpara konferencës së parë ndërqeveritare.”
Në draft-rekomandim vleresohen arritjet e Shqipërisë, veçanërisht në 5 prioritetet e vendosura me parë nga Komisioni.
“Këshilli përshëndet progresin e qëndrueshëm të Shqipërisë në ndjekjen e reformave që lidhen me pesë prioritetet kyçe. Ristrukturimi institucional i gjyqësorit është në vazhdim, si një gur themeli i një reforme gjithëpërfshirëse të drejtësisë. Procesi i ri-vlerësimit për gjyqtarët dhe prokurorët ka filluar të japë rezultatet e para të prekshme, duke përfshirë edhe anëtarët e lartë të gjyqësorit, nën mbikëqyrjen e Operacionit Ndërkombëtar të Monitorimit. Këshilli inkurajon Shqipërinë që të vazhdojë bashkëpunimin e saj të mirë me Operacionin Ndërkombëtar të Monitorimit. Këshilli inkurajon Shqipërinë që të zhvillojë progresin e konsiderueshëm deri tani dhe të ndjekë intensivisht reformën e drejtësisë, që synon rritjen e pavarësisë, llogaridhënies, profesionalizmit dhe efikasitetit të sistemit gjyqësor, sidomos nëpërmjet avancimit të mëtejshëm të procesit të verifikimit, i cili është vendimtar.”
Por dokumenti mbetet ende në diskutim nga të gjithë vendet dhe duket se oponenca më e fortë po behet nga Franca dhe Presidenti Macron, i cili ende vijon të jetë skeptik për pranimin e vendeve të reja në Bashkimin Europian.
Gjithesesi, pritet që me datë 26 qershor drafti të diskutohet mes Ministrave të Jashtëm, të cilët me pas do t’ia adresojnë atë krerëve të shteteve të Unionit.
