“Drafti Rama”, Kurti: Le t’ia propozojë Vuçiçit për shqiptarët në Luginën e Preshevës!

Duke e pranuar se nuk e ka lexuar Draftin e Statutit për Ascociacionin e komunave me shumicë serbe të hartuar nga Kryeministri Edi Rama, Kryeministri i Kosovës, Albin Kurti, tha se beson në atë që beson Rama se Drafti është i duhur dhe i sugjeron që t’ia propozoj Presidentit të Serbisë, Aleksandar Vuçiç, për shqiptarët në Luginën e Preshevës.

“S’kam dyshim që kryeministri Edi Rama, beson që propozimi i tij i draft-statutit është i mirë dhe duke qenë kështu atëherë krejt çka unë propozoj është që kryeministri Edi Rama, këtë draft-statut për pakicat kombëtare t’ia prezantojë presidentit të Serbisë, Aleksandar Vuçiç, më së largu në takimin e radhës për Ballkanin e Hapur për shqiptarët në Luginë.

Patjetër që ai beson se është model i duhur, e këtë do të duhej t’ia bënte si propozim presidentit të Serbisë për shqiptarët në Luginë, aq më tepër që neni 8 pika 1 e Kushtetutë së Shqipërisë thotë se mbron të drejtat kombëtare të popullit shqiptar kudo,” tha sot Kryeministri Albin Kurti duke ritheksuar se në takimin e 18 marsit në Ohër kishte propozuar që vetë ta bëjë Draftin e vetëmenaxhimin e komunitetit serb në Kosovë, por atë, tha ai, nuk mund ta bëjë pa pasur pajtim për parimet bazë dhe frymën.

Ndryshe, Drafti e Statutit për Ascociacionin e komunave me shumicë serbe të hartuar nga Kryeministri Edi Rama pa u konsultuar fare me Kryeministrin e Kosovës, Albin Kurti, i është dërguar Presidentit të Francës, Emmanuel Macron, Kancelarit të Gjermanisë, Olaf Scholz, dhe Këshillit Evropian.