Drama e efektivitetit të qeverisë, 40 mln euro në 7 muaj për zyrat dhe pajisjet e tyre, në trefishim

Ndryshimi i strukturës qeveritare pas zgjedhjeve të qershorit 2017 dhe riformatimi i zyrave të administratës qendrore sidomos, ka rritur në mënyrë dramatikë shpenzimet për zyra dhe orenditë e tyre dhe për ripërshtatjen e ambienteve.

Sipas të dhënave të Ministrisë së Financave për shpenzimet e 7 mujorit 2018 një shumë prej më shumë se 5 miliardë lekësh shkoi për orendi dhe pajisje zyrash, rikonstruksione godinash dhe përshtatje ambientesh. Kjo shumë sipas kursit mesatar të vitit 2018 është rreth 40 milionë euro dhe gati trefishi i shpenzimeve që u bënë për këtë qëllim një vit më parë.

Të dhënat u përpunuan nga Monitor në data bazën e shpenzimeve që ministria e Financave ka publikuar për 7 mujorin. Por shpenzimet për fasada, rikonstruksione dhe orendi zyrash janë më të mëdha pasi ato janë shpërndarë në listën e shpenzimeve me emërtime të ndryshme. Por një sistem filtrimi mbi zërat kryesor nxori se, shpenzimet për periudhën 5 mujore janë rreth 40 milionë euro, të barazvlefshme për ndërtimin një spitali rajonal me kushte moderne.

Qeveritë shqiptare ndër vite kanë shfaqur simptoma të rënda në menaxhimin e shpenzimeve publike. Pa prioritete të qarta të zhvillimit të qëndrueshëm, taksat e shqiptarëve zbrazen në projekte jo efecientë. Ndërrimi i destinacionit të një strukture qeverisë për më shumë se tre herë në katër vite ka krijuar kosto të panevojshme në buxhet.

Të ardhurat buxhetore kanë pësuar rritje konstante nga viti në vit, teksa nga ana tjetër rishpërndarja e tyre është copëzuar në projekte që nuk sjellin zhvillim. Rrogat dhe pensionet vetëm sa janë indeksuar me inflacionin dhe produktet e mëdha të investimeve mungojnë.

Institucionet Financiare ndërkombëtare si Banka Botërore në studimet të posaçme ka vënë disa herë në dukje mungesën e eficencës së investimeve.

Vetkontrollet e qeverisë në entet e saj nëpërmjet njësive të auditit të brendshëm kanë zbuluar 7,8 miliardë lekë ( 58 milionë euro) shpërdorime nga kontrollet e ushtruara gjatë vitit të kaluar sipas të dhënave nga Ministria e Financave për vitin 2017.

Drejtoria e Auditit në Ministrinë e Financave vëren se janë konstatuar 6286 raste të shkeljeve, për të cilat vlera ë dëmeve llogaritet në 7.8 miliardë lekë./Monitor/