“Drama Meta”/ Pas një lumi akuzash, Edi Rama filloi aktin e parë të shkarkimit të Presidentit

Regjisori, aktori dhe sufleri i “Dramës Meta”, Edi Rama, pas një fjalimi pasionant kundër mikut të tij Ilir Meta, me 102 vota për, 7 kundër dhe dy abstenime miratoi në Parlament Komisionin Hetimor, si aktin e parë të shkarkimit të Presidentit të Republikës.

Para votimit, Kryeministri Edi Rama tha nga foltorja e Parlamentit, se Presidenti Ilir Meta duhet hetuar dhe ndëshkuar ndersa e konsideroi Metën armikun e hapur të Kushtetutës.

“Ilir Meta do të ishte politikisht për ne një kundërshtar që duhet ndaluar të gabojë më tutje. Ai është sot një aset i vyer i kësaj shumice qeverisëse. Për ne, dinjiteti i këtij shteti është më i rëndësishëm se sa çdo interes partiak. Ilir Meta duhet hetuar dhe ndëshkuar deri në fund nga ky Kuvend dhe reagimi ynë ndaj tij duhet të jetë frontal përtej dallimeve tona politike dhe në emër të Kushtetutës, demokracisë parlamentare.

Graviteti i Kuvendit është një emërues që duhet të na bashkojë. Ilir Meta nuk është thjesht kundërshtari i qeverisë, ai është sot armiku i hapur i Kushtetutës së Shqipërisë. Ai është sot armiku i deklaruar i Parlamentit të Shqipërisë. Nuk është thjesht politikani i frikësuar deri në palcë i reformës në drejtësi, është sot vetë shëmbëlltyra e kundërshtarëve të reformës në drejtësi.

Shqipëria në NATO, Shqipëria kandidate për BE, me një kryetar shteti që duket si aktor komik, që kur flet seriozisht të bën për të qeshur dhe kur flet për të qeshur të bën për të qarë,” tha Edi Rama duke folur per njeriun qe e solli ne pushtet dhe e beri Kryeminister.

Dhe jo vetëm kaq! Edi Rama reagoi edhe ndaj deklaratës së Presidentit se ishte i gatshëm të kryente testin e shëndetit mendor dhe se kjo duhet të ishte në standard për çdo zyrtar të lartë. Kjo për Kryeministrin tregon se Presidenti ka ikur nga mendja e kokës:

“Si mund të thotë një President në një konferencë për shtyp që jam gati të bëj testin mendorë? Askush nuk ka mbetur pa pyetur veten, se mos vallë ky njeri ka ikur nga mendja e kokës? Po kjo pyetje mund të çojë në drejtim të gabuar, sëmundja e vërtetë e këtij kreu shteti është ajo e personazhit të Dostojevskit që gënjen veten për të gënjyer të tjerët. Sfida më e madhe, thotë Dostojevski, është të mos gënjesh veten jo të tjerët.

Po nëse Ilir Meta ja lejon vetes të ngatërrojë tërë dynjanë, poshtërimin e Institucionit të Presidentit të Republikës, ky parlament nuk mund t’iaa lejojë vetes këtë rrezik komedia ndërkombëtare. Ilir Meta e ka shkelur Kushtetutën më shumë se sa një herë, ka penguar arbitrarisht dekretimin e ministrave.

Më shumë se një herë ka cenuar autoritetin e Kuvendit, duke kthyer mbrapsht ligje të miratuara nga ky parlament, ndërsa jo pak herë e ka fyer këtë parlament duke e quajtur ilegjitim dhe ka kërcënuar duke kuptuar shpërndarjen e tij. Në tërë historinë  e demokracive parlamentare, aq larg ka shkuar Presidenti, saqë edhe paraardhësi i tij duket si Xhefersoni, krahasuar me Metën.

Po këtë herë ai ka kaluar edhe vetveten bashkë me cakun tonë për të mos reaguar institucionlisht. Ilir Meta ndërhyri brutalisht, në mes të fushatës zgjedhore, me një antidekretin e tij, ku nxiti dhe frymëzoi aktet e vandalizmit ndaj infrastrukturës zgjedhore. Ai u kthye nga Presidenti problematik të Shqipërisë, në Tribunin patetik të lëvizjes së Haxhi-Qamilësve. Shkarkim nga detyra e Lartë e këtij personazhi, i cili solli në skenë e historisë sonë si president, Haxhi Qamilin, është një detyrim i çdo deputeti që nuk e ka harruar betimin para Kuvendit. Ilir Meta nuk e ka mbushur kupën, por e ka derdhur dhe vazhdon ta derdhë çdo ditë.

Ndryshe nga Ilir Meta, që i ka kërcyer shtetit përsipër, ne nuk mund ta përdorim fuqinë absolute të Kuvendit si topi i Mato Grudës. Me ligj ai mund të shkarkohet vetëm pasi Komisioni hetimorë, që votojmë sot, të kryej misionin kushtetues. Ne do të respektojmë deri në fund, Kushtetutën dhe ligjin,” tha Kryeministri Edi Rama duke iu drejtuar me një thirrje të drejtpërdrejt Presidentit Ilir Meta, për të ndalur sulmet ndaj njësive diplomatike dhe qeverisë.

Por nuk do te quhej Edi Rama sikur fjalroi i tij te zheveshej nga tallja dhe denigrimi i rivaleve qe ne rast u mundua ta binde opinionin se eshte Ilir Meta:

“I çoroditur nga drejtësia e re, hakërrues dhe qesharak në pafuqinë e tij, Ilir Meta vulosi rrugën e tij. Ne jemi detyruar që Metën ta lëmë të gabojë. Meta duhet hetuar dhe ndëshkuar deri në fund nga ky Kuvend. Reagimi ndaj tij duhet të jetë frontal, përtej dallimeve politike, për Kushtetutën dhe dinjitetin e shtetit shqiptar. Meta sot është armik i Kushtetutës së Shqipërisë, ai është sot armiku i parlamentit të Shqipërisë, ai sot është vetë shëmbëlltyra e tërbimit të trembur nga drejtësia. Meta na turpëron si qytetarë, si popull, si shtet. Një kryetar shteti që është kthyer në qesharak, që e imagjinon veten si Vojo Kushi me tank apo Mic Sokoli me kostum banjo. Sëmundja e vërtetë e këtij kreu shteti është ajo e personazhit të Dostojevskit, që gënjen veten për të gënjyer tjerët, prandaj ai është i sëmurë,” tha Rama duke i bere thirrje publike Ilir Metës të reflektojë dhe ta grumbullojë veten e shpërndarë dhe ta mbledhë brenda kornizës së përgjegjësive të kompetencave të tij.

“Të ndërpresë çdo sulm kundër përfaqësive diplomatike të Shteteve të Bashkuara dhe Bashkimit Evropian në Shqipëri. Të ndërpresë çdo sulm ndaj Parlamentit, të cilin nuk ka defekt presidencial që e cenon me legjitimitetin e vet, siç nuk ka dekret molotov që ia shkurton mandatin e tij.

Të ndërpresë aktivitetin e tij të paligjshëm politik, kundër qeverisë së Republikës së Shqipërisë me të cilën duhet të sillet siç ia kërkon Kushtetuta.

Të ndërpresë aktivitetin e paligjshëm kundër qeverisë e cila do të sillet siç e kërkon Kushtetuta dhe jo siç e urdhërojnë zërat e brendshëm të realitetit imagjinar ku është transferuar së fundmi.

Mirë do ishte të ndalonte përgojimin e figurave heroike të këtij vendi, sepse paralelizmat mes tyre dhe figurat e tij, keq informon brezin e ri dhe stimulojnë agresivitetin e injorancës ndaj shoqërisë dhe shtetit ligjor, po kjo mbetet një vërejtje miqësore.”

Ne fund, pas denigrimit ekstrem te Presidentit dhe duke u bazuar ne te kaluaren socialiste, Edi Rames i ngelet vetem te kthehet ne realitetin komunist dhe te beje serish koalicion meLSI-ne ne perpjekjen e tij te fundit per ta zhdukur Partine Demokratike.