Drejtësia që do Erion Veliaj/ Të gjithë gënjejnë njëri tjetrin, seanca shtyhet më 19 Janar
Kjo është “Drejtësia që duan Socialistët” vetëm të mos mbahet as seanca paraprake kundër Erion Veliajt, dhe GJKKO shtyn seancën për 19 Janar! Kush nuk gënjen në këtë vorbullë kriminale?!
Fillimisht u tha se shkak për shtyrjen e seancës u bë mungesa e dy avokatëve mbrojtës, mes tyre edhe avokatja kryesore e caktuar për mbrojtjen e Erion Veliajt, e cila, u tha zyrtarisht, se përmes një emaili ka kërkuar shtyrjen e seancës, duke argumentuar se ndodhej jashtë vendit.
Por, në seancë nuk ishte i pranishëm as vetë Kryetari i Bashkisë Tiranë, Erion Veliaj, ndonëse bëhej fjalë për një seancë të rëndësishme për të, ku GJKKO duhej të vendoste për kalimin ose jo për gjykim të dosjes në ngarkim të kryebashkiakut të Tiranës. Por, ai zgjodhi të ankohet se Drejtoria e Burgjeve nuk i kishte siguruar transferimin me kohë në Gjykatën e Posaçme!
Në fund, në këtë shtet kur nuk dihet më se kush është krimi e kush është drejtësia, reagon Drejtoria e Përgjithshme e Burgjeve duke iu përgjigjur pretendimeve të Erion Veliajt, dhe thekson se nga ana e tyre nuk ka pasur asnjë pengesë për zhvillimin normal të seancës së sotme paraprake në GJKKO për kalimin ose jo për gjykim të dosjes në ngarkim të kryebashkiakut të Tiranës.
A po përsëritet tallja me drejtësinë si në çështjen “Dritan Dajti” mbetet për tu parë, por që Drejtësia nuk është reformuar nuk ka nevojë të lexohet asnjë vendim i GJKKO, dallimi i vetëm është se sot liria është më e shtrenjtë!
Deklarata e plotë e Drejtorisë së Burgjeve:
Në lidhje me reagimin e bërë në media nga Këshilli Bashkiak i Tiranës, Drejtoria e Përgjithshme e Burgjeve sqaron se janë të pavërteta pretendimet lidhur me orarin e transferimit të shtetasit Erion Veliaj nga IEVP Durrës drejt Gjykatës së Posaçme kundër Korrupsionit dhe Krimit të Organizuar.
Forcat e Policisë së Burgjeve, në varësi të Drejtorisë së Përgjithshme të Burgjeve, kanë njoftuar në kohë shtetasin E.V. për përgatitjen dhe nisjen drejt seancës gjyqësore. Mjetet e Policisë së Burgjeve kanë qenë të pranishme në ambientet e IEVP-së në kohën e parashikuar. Në momentin e njoftimit, shtetasi E.V. ka refuzuar të dalë, duke pretenduar se mjeti i Policisë së Burgjeve ishte vonuar.
Drejtoria e Përgjithshme e Burgjeve thekson se për çdo vonesë apo ndryshim orari, kancelaria e gjykatës njoftohet zyrtarisht dhe se nga ana jonë nuk ka pasur asnjë pengesë për zhvillimin normal të procesit gjyqësor.
