“Drejtësia që duam”/ Humbin përkthimet, Tahiri: Qesharake! Heq dorë nga…

Në drejtësinë shqiptare, sa më shumë fut duart Kryeministri Edi Rama me Refromën e tij, ajo aq më shumë qesharake bëhet. Sot, Gjykata e Krimeve të Rënda zbuloi mungesën e tri dëshmive të përkthyera në dosjen ndaj Ish-Ministrit të Brendshëm, Saimir Tahiri, ku për pasojë u bë shtyrja e radhës e seancës; Dhe, Gjykata nuk u shpreh as këtë herë nëse do të pranojë apo jo kërkesën e Ish-Ministrit të Brendshëm, Saimir Tahiri dhe Ish-Drejtorit të Policisë së Vlorës, Jaeld Çela, për gjykim të shkurtuar.

Sot gjykata hapi shqyrtimin gjyqësor të çështjes, ndërsa prokurorët lexuan kërkesën për gjykim për dy të pandehurit, Saimir Tahiri dhe Jaeld Çela, ndërsa pezulloi për një vit gjyqin për dy të pandehurit e tjerë Sokol Bode dhe Gjergji Koila.

Seanca u ndërpre kur kryesuesi Ardit Mustafai konstatoi se në 74 fashikujt e hetimit të dorëzuar në gjykatë mungonin përkthimet në shqip të dëshmive të të pandehurve Moisi Habilaj, Nezar Seiti dhe Meridian Sula, të cilat ishin vetëm në gjuhën italiane.

Prokurorët kërkuan kohë për ta verifikuar dhe nëse nuk gjendeshin të siguronin në kohë përkthimin e tyre. Por Saimir Tahiri kërkoi që seanca të mos shtyhej, duke deklaruar se hiqte dorë nga këto dëshmi që ishin në favor të tij dhe gjykimi të vazhdonte.

“Ju jeni dëshmitarë që ky proces është shtyrë për të tretën herë. Hera e parë sepse letrat që kishte sjellë posta ishin të grisura, hera e dytë sepse policia nuk kishte bërë njoftimet dhe hera e tretë se prokuroria ka humbur ca letra.

Unë nuk e di, por edhe një çerdhe është më e organizuar se kaq. Nuk e di si mund të ndodhi që të humbasi letra në prokurori kur ka protokoll, kur ka një sistem, kur dihet kush i ka dërguar dhe kush i ka marrë. Unë nuk e di si mund të vazhdohet kështu dhe cfarë serioziteti është ky kur praktikisht prokuroria me këto letra kërkoi arrestimin tim në parlament. Kjo është qesharake. Unë nuk dua tja di nëse është e qëllimshme apo gabim njerëzor. Nëse është e qëllimshme është e keqja më e vogël në fakt. Sepse kush ka qëllim për ta zvarritur ka gjetur një rrugë kaq banale, sa humbja e  letrave?! Unë shpresoj të jetë mungesë vëmendje, madje nuk dua ti vë emër. Unë e thashë dhe në seancë ato janë prova në favorin tim, por unë heq dorë mjafton që gjyqi mos të shtyhet sepse u bë tërkuzë.”

Saimir Tahiri tha se ishte në dijeni se Ministria e Drejtësisë me firmën e ministres i ka sjellë përkthimet në prokurori.

“Se ku janë le ti gjejnë prokurorët. Unë di të them që e quaj të tepër të shtyhet gjyqi për herë të tretë. Është qesharake, skandaloze, poshtëruese për drejtësinë jo për mua,” tha ai i acaruar duke shtuar:

“Mua më intereson që gjyqi të mos zgjatet. Kjo është qesharake, ky shtet nuk mund të jetë kështu, drejtësia nuk mund të jetë kështu. Kur ndodh me mua, vaj halli çfarë ndodh  me njerëzit.

Është e shëmtuar, unë nuk di si mund të ndodhë kjo në Prokurorinë e Krimeve të rëndë në një proces mediatik. Bëhet fjalë për shkresa që i keni nxjerrë ju. Kur i ka media nuk i paska prokuroria, ose ka bërë gabim ju kanë dhënë origjinalet dhe tani nuk i gjejnë.”

Seanca e radhës u caktua 22 korrik në orën 11 ku prokurorët do të paraqesin përkthimet dhe gjykata do të shprehet nëse do të pranojë apo jo gjykim të shkurtuar për Ish-Ministrin e Brendshëm, Saimir Tahiri.